بلوچستان کے دارالحکومت کوئٹہ اور اس کے نواحی علاقوں میں شہریوں نے آسمان پر نایاب رنگین بادلوں کا حیرت انگیز نظارہ کیا۔
سوشل میڈیا پر متعدد صارفین نے اس دلکش منظر کی تصاویر اور ویڈیوز شیئر کیں، جن میں بادل مختلف رنگوں کی جھلک کے ساتھ موتیوں جیسی چمک بکھیرتے نظر آئے۔
یہ بھی پڑھیں: کوئٹہ کے شہریوں کو برفباری کا انتظار، ’وادی نے اب تک سفید چادر کیوں نہیں اوڑھی‘
ماہرینِ موسمیات کے مطابق یہ مظہر دراصل ’ایریڈیسنٹ کلؤوڈز‘ کہلاتا ہے، جسے مدر آف پرل کلاؤڈز یا نیکریئس کلاؤڈز بھی کہا جاتا ہے۔
یہ نایاب بادل اُس وقت بنتے ہیں جب سورج کی روشنی فضا میں موجود نہایت باریک پانی کے قطروں یا برف کے ذرات سے منتشر ہو کر قوسِ قزح جیسا منظر پیدا کرتی ہے۔
یہ مظہر عام طور پر اونچی فضائی تہوں میں بنتا ہے، جیسے سیروس یا آلٹوکیومولس بادل، اور طلوعِ آفتاب یا غروبِ آفتاب کے وقت سب سے زیادہ نمایاں ہوتا ہے، جب سورج افق کے نیچے ہوتا ہے مگر اس کی شعاعیں بادلوں کو براہِ راست منور کرتی ہیں۔
مزید پڑھیں: فلک بوس کرایے اور زمین بوس سیاحت
سوشل میڈیا پر بعض صارفین نے ان رنگین بادلوں کو مبینہ طور پر کسی ہائپرسونک میزائل ٹیسٹ سے بھی منسلک کیا۔
تاہم ماہرین نے اس تاثر کی سختی سے تردید کرتے ہوئے واضح کیا ہے کہ یہ ایک قدرتی مظہر ہے جس کا کسی فوجی سرگرمی سے کوئی تعلق نہیں۔
