نگران وزیراعلی پنجاب محسن نقوی نے پولیس اہلکاروں کو خواتین کو حراست میں لینے سے روک دیا، کہا مطلوب خواتین کی گرفتاری لیڈیز پولیس کے ہمراہ یقینی بنائی جائے اور کوشش کی جائے کہ انہیں خواتین پولیس اسٹیشنز میں ہی رکھا جائے۔ پنجاب بھر میں 9 مئی کو درج کیے گئے 138 مقدمات میں 500 سے زائد خواتین مطلوب ہیں۔
ترجمان پنجاب حکومت کے مطابق نگران وزیراعلیٰ پنجاب محسن نقوی نے کہا ہے کہ فوجی تنصیبات پر حملوں میں ملوث خواتین کو ہر صورت گرفتار کیا جائے گا، فوجی تنصیبات پر حملوں میں ملوث خواتین کسی رعایت کی مستحق نہیں۔
محسن نقوی نے کہا ہے کہ انسداد دہشت گردی (اے ٹی سی) کی دفعات کے تحت درج ایف آئی آرز میں شامل خواتین کو بھی گرفتار کیا جائے گا، فوجی مقامات پر حملوں خاص طور پر جناح ہاؤس کے اندر اور باہر موجود خواتین سے لیڈیز پولیس سٹیشن میں آکر خود گرفتاری دینے کی صورت میں رعایت برتنے کا فیصلہ بھی کیا گیا ہے۔
