جی 20 ممالک بھارت کو مقبوضہ کشمیر میں کانفرنس سے باز رہنے کا کہیں، سابق وزیراعظم آزاد کشمیر

سابق وزیراعظم آزاد کشمیر سردار تنویر الیاس نے کہا ہے کہ تمام جی 20 ممالک سے درخواست ہے ہندوستان کو مقبوضہ کشمیر میں کانفرنس سے باز رہنے کا کہیں، کیونکہ مسئلہ کشمیر آج اقوام متحدہ کی سیکورٹی کونسل میں حل طلب ہے۔

سابق وزیراعظم آزاد کشمیر سردار تنویر الیاس نے جی 20 اجلاس کے حوالے سے اپنے پیغام میں کہا ہے کہ بھارت متنازعہ وادی کشمیر میں جی 20 کانفرنس کروانے کا ارادہ رکھتا ہے۔ چین نے جس مؤقف کا اعادہ کیا اور بھارت کو وارننگ دی، دیگر ممبر ممالک کو بھی پُر زور انداز سے بھارت کو کہنا ہوگا، دیگر ممالک کو بھی اس طرح کی کانفرنس میں شرکت نہیں کرنی چاہیے۔

سردار تنویر الیاس نے کہا مقبوضہ کشمیر میں انسانی حقوق کی خلاف ورزی کی جا رہی ہے، ہندوستان تحریک آزادی کو بدنام کرنے کے لیے وہاں پر ایسی کوئی کارروائی بھی کرسکتا ہے۔ تمام جی 20 ممالک سے درخواست ہے کہ ہندوستان کو اس کانفرنس سے باز رہنے کا کہیں۔

سردار تنویر الیاس کا کہنا تھا ہندوستانی فوج نے کشمیری رہنما شیبر شاہ کی فیملی کو ہراساں کیا، پوری دنیا کو آگے بڑھ کر بھارتی فوج کے اس اقدام کی مذمت کرنی چاہیے، ہندوستانی اقدامات کی وجہ سے انسانیت سسک رہی ہے چیخ رہی ہے۔

سابق وزیراعظم آزاد کشمیر کا کہنا تھا 22 مئی کو مظفرآباد میں پُر امن ریلی منعقد کریں گے، جی 20 کانفرنس کے موقع پر کشمیری پاکستانی جہاں بھی ہیں سراپا احتجاج بن جائیں، ہندوستانی اقدامات کیخلاف ایسا احتجاج کریں کہ دنیا دیکھے اور سوال پوچھنے پر مجبور ہو جائے کہ یہ قوم کیوں نکلی ہے۔