بھارتی شہر بینگلورو میں ایک ریپڈو بائیک رائیڈر پر دورانِ سفر خاتون کے ساتھ بدتمیزی کی کوشش کا الزام عائد کیا گیا ہے، خاتون کے مطابق رائیڈر نے سفر کے دوران ان کی ٹانگ چھونے کی کوشش کی، جس پر انہوں نے ویڈیو ریکارڈ کر کے پولیس سے رجوع کیا۔
میڈیا رپورٹس کے مطابق مبینہ واقعے کی ولسن گارڈن پولیس اسٹیشن میں مقدمہ درج کر کے تحقیقات شروع کردی گئی ہیں۔
یہ بھی پڑھیں: 2 آسٹریلوی خاتون کرکٹرز سے دست درازی، بھارت غیرملکی کھلاڑیوں کے لیے غیر محفوظ ملک بن گیا
شکایت کنندہ خاتون نے انسٹاگرام پر اپنی روداد شیئر کرتے ہوئے بتایا کہ وہ چرچ اسٹریٹ سے اپنے پیئنگ گیسٹ ہاؤس واپس جارہی تھیں جب ریپڈو کے رائیڈر نے دورانِ سفر ان کی ٹانگ چھونے کی کوشش کی۔
خاتون کے مطابق ’یہ سب اتنی اچانک ہوا کہ میں کچھ سمجھ ہی نہ سکی، نہ ہی ریکارڈنگ کرپائی، جب اس نے دوبارہ ایسا کیا تو میں نے کہا، بھائیہ کیا کررہے ہو، مت کرو، لیکن وہ نہیں رکا۔‘
انہوں نے مزید بتایا کہ وہ چونکہ علاقے میں نئی تھیں اس لیے انہیں راستے کا علم نہیں تھا اور وہ بائیک رکوانے سے بھی خوفزدہ تھیں۔
یہ بھی پڑھیں: اپنے ملک واپس چلی جاؤ، برطانیہ میں بھارتی خاتون کے ساتھ زیادتی اور نسل پرستی کا واقعہ
خاتون کے مطابق منزل پر پہنچنے کے بعد قریب موجود ایک شخص نے واقعہ دیکھا اور رائیڈر سے بازپرس کی۔ رائیڈر نے معافی مانگی مگر جاتے ہوئے ایسے انداز میں اشارہ کیا جس سے وہ مزید خوفزدہ ہوگئیں۔
انہوں نے کہا کہ وہ یہ واقعہ اس لیے عوام کے سامنے لارہی ہیں تاکہ کوئی اور خاتون ایسی صورتحال کا شکار نہ ہو۔
پولیس نے واقعے کی تحقیقات شروع کردی ہیں، جبکہ ریپڈو انتظامیہ کا مؤقف تاحال سامنے نہیں آیا۔
