پاکستان کو دوسری مرتبہ ایشیائی رگبی چمپئن شپ کی میزبانی کے حقوق مل گئے ہیں، اس سال ایشیا رگبی چیمپیئن شپ 4 سے 8 جولائی تک لاہور میں منعقد ہو گی۔
پاکستان رگبی یونین (پی آر یو) کے ترجمان نے اپنے بیان میں تصدیق کی ہے کہ ایشیا رگبی ڈی آئی وی ون چیمپیئن شپ کے انعقاد کا اعزازپاکستان کو مل گیا ہے، جس کےتحت اب یہ غیر ملکی ٹیموں پر مشتمل ایونٹ 4 سے 8 جولائی تک لاہورمیں منعقد ہو گا۔
واضح رہے کہ یہ دوسرا موقع ہے کہ ایشیا رگبی کونسل نے ایشیائی رگبی چیمپیئن شپ کے انعقاد کے حقوق پاکستان کو دیے ہیں۔ پاکستان نے گزشتہ سال بھی اس ایونٹ کی میزبانی کی تھی۔
پاکستان رگبی یونین کے ترجمان کے مطابق اس ایشیائی ایونٹ میں براعظم ایشیا کی رگبی ٹیمیں شامل شریک ہوں گی جن کے ناموں کا اعلان ایشیئن باڈی کوالیفائنگ راؤنڈ مکمل ہونے کے بعد کیا جائے گا۔
ترجمان نے مزید کہا کہ پاکستان رگبی یونین پورے ایشیا سے ٹیموں اور شائقین کو پاکستان آنے پر خوش آمدید کہنے کے لیے تیار ہیں۔ پاکستان اپنے مہمانوں کی میدان کے اندر اور باہر بہترین میزبانی کرے گا۔
