اسلام آباد پولیس نے سہ ملکی کرکٹ سیریز کے سلسلے میں جاری ٹریفک ایڈوائزری میں شہریوں کو ممکنہ ٹریفک صورتحال سے آگاہ کیا ہے۔
اسلام آباد پولیس کے ترجمان کے مطابق کرکٹ ٹیموں کی اسلام آباد سے راولپنڈی کرکٹ اسٹیڈیم تک موومنٹ کے دوران رش کے اوقات میں سری نگر ہائی وے، کلب روڈ اور نائنتھ ایونیو پر ڈائیورشنز لگائی جائیں گی، جس کے باعث ان شاہراہوں پر ٹریفک کی روانی متاثر ہوسکتی ہے۔
یہ بھی پڑھیے: سہ ملکی کرکٹ سیریز کے باعث ریڈ زون کی اہم سڑکیں عارضی طور پر بند
اسلام آباد پولیس نے شہریوں کو مشورہ دیا ہے کہ وہ سفر کے لیے 15 سے 20 منٹ اضافی وقت رکھ کر روانہ ہوں تاکہ کسی پریشانی سے بچا جاسکے۔
ترجمان نے کہا کہ ٹریفک پولیس شہریوں کی سہولت کے لیے ہر ممکن اقدامات کرے گی جبکہ ٹریفک سے متعلق تازہ معلومات پولیس کے سوشل میڈیا پیجز اور ایف ایم 92.4 کے ذریعے بھی فراہم کی جائیں گی۔
اعلامیے میں شہریوں سے اپیل کی گئی ہے کہ وہ ٹریفک پولیس سے تعاون کریں اور تحمل کا مظاہرہ کریں، جبکہ کسی بھی ایمرجنسی کی صورت میں پکار 15 اور ٹریفک ہیلپ لائن 1915 پر رابطہ کیا جاسکتا ہے۔
