بھارتی ریاست ہریانہ میں ایک 16 سالہ باسکٹ بال کھلاڑی اس وقت انتقال کر گیا جب ورزش کے دوران باسکٹ بال کا پول اس کے سینے پر گر گیا۔ کھلاڑی کورٹ میں پریکٹس کر رہا تھا جب پول آگے کی طرف سے اس کے اوپرگرا اور نوجوان انتقال کر گیا۔
حادثے کی ہولناک سی سی ٹی وی فوٹیج میں دیکھا جا سکتا ہے کہ ہاردک اکیلا کورٹ میں پریکٹس کر رہا تھا۔ وہ پوائنٹ لائن سے دوڑتا ہے اور چھلانگ لگا کر باسکٹ تک پہنچتا ہے۔ کھلاڑی نے پہلی کوشش بخوبی مکمل کی پھر وہ دوبارہ کوشش کرتا ہے۔ اس بار وہ باسکٹ کے رم کو پکڑتا ہے کہ اچانک پول اکھڑ کر اس پر گر جاتا ہے اور پورا وزن اس کے سینے پر پڑتا ہے۔
Teen Basketball Player Dies In Freak Court Accident In Rohtak
NDTV's @ShivAroor joins @ParmeshwarBawa with more details pic.twitter.com/x6lHrXPQdM
— NDTV (@ndtv) November 26, 2025
کھلاڑی کے ساتھی جو شاید اس وقت بریک لے رہے تھے کورٹ کی طرف دوڑے۔ انہوں نے پول اٹھا کر ہاردک کو بچایا لیکن نقصان ہو چکا تھا اور 16 سالہ کھلاڑی انتقال کر گیا۔
یہ بھی پڑھیں: کراچی کی ٹاپ ٹینس کھلاڑی زینب علی کا اسلام آباد میں ٹورنامنٹ کے دوران اچانک انتقال
ہاردک کے پڑوسیوں نے بتایا کہ وہ قومی ٹیم کے لیے منتخب ہو چکا تھا اور حال ہی میں تربیتی کیمپ سے واپس آیا تھا۔ اس کے والد سندیپ نے ہاردک اور اس کے چھوٹے بھائی کو اپنے گھر کے قریب واقع ایک اسپورٹس کلب میں داخل کروایا تھا، جہاں وہ پریکٹس کر سکتے تھے۔ پولیس نے لاش قبضے میں لے کر پوسٹ مارٹم کے بعد خاندان کے حوالے کر دی ہے۔
حیران کن طور پر ایک ایسا ہی واقعہ ہریانہ کے بہادر گڑھ ضلع میں بھی پیش آیا جہاں 15 سالہ امن ایک اسٹیڈیم میں پریکٹس کر رہا تھا کہ باسکٹ بال کا پول اس پر گر گیا۔ اس کو قریبی اسپتال منتقل کیاگیا لیکن وہ جانبر نہیں ہو سکا جس پر اہلخانہ نے ڈاکٹروں پر الزام لگایا کہ نوجوان کو مناسب علاج فراہم نہیں کیا گیا۔
