چیئرمین سینیٹ محمد صادق سنجرانی نے 9 مئی کے واقعات پر انتہائی دکھ اور افسوس کا اظہار کرتے ہوئے کہا ہے کہ ملک میں توڑ پھوڑ اور قومی املاک کو پہنچنے والے نقصانات سے دل بہت رنجیدہ ہے۔
چیئرمین سینیٹ نے ایک وفد کے ہمراہ جناح ہاؤس لاہور کا دورہ کیا۔ یہاں انہوں نے صحافیوں سے گفتگو کرتے ہوئے کہا کہ جناح ہاؤس لاہور سمیت ملک میں قومی سلامتی کے اہم اداروں پر9 مئی کو جو حملے کیے گئے وہ یقیناً قابل مذمت ہے۔ جناح ہاؤس ہمارا تاریخی ورثہ ہے اس کی توڑ پھوڑ اور جلاؤ گھیراؤ پردل بہت رنجیدہ ہوا۔
انہوں نے کہا کہ ایسے واقعات سے دْشمن قوتوں کو حوصلہ ملتا ہے، سیاسی مسائل کا واحد حل بات چیت و مذاکرات ہیں۔ ہمیں زندگی کے ہر پہلو میں صبروتحمل کامظاہرہ کرنا چاہیے۔
انہوں نے کہا کہ پاکستانی عوام اپنی مسلح افواج کے ساتھ کھڑے ہیں۔ سیکیورٹی فورسز نے بہت تحمّل کا مظاہرہ کیا۔ سیکیورٹی فورسز دہشتگردی جیسے چیلنجز سے نمٹنے کے لیے کوشاں ہیں۔ پاکستان کی افواج کا تحمل و تدبر قابلِ تحسین ہے، جس نے مذموم سازش کو ناکام بنا دیا۔ ہم اپنی پاک فوج کے ہمیشہ ساتھ تھے اور رہیں گے۔
انہوں نے کہا کہ ملک کے تاریخی اثاثوں کی حفاظت ہم سب کی ذمہ داری ہے۔ ہمیں ملک کی ترقی و خوشحالی کے لیے کام کرنا ہوگا ۔ چیئرمین سینیٹ نے اس موقع پر مہمانوں کے لیے رکھی گئی کتاب میں اپنے تاثرات بھی قلم بند کیے۔
چیئرمین سینیٹ کے ہمراہ جناح ہاؤس کا دورہ کرنے والے وفد میں سینیٹرزمشاہد حسین سید، ہدایت اللہ، عرفان الحق صدیقی، سرفراز بگٹی، منظوراحمد کاکڑ، حاجی ہدایت اللہ خان، ہلال الرحمٰن، رانا مقبول، شاہین خالد بٹ اور دیگر شامل تھے۔
