ترجمان پاک فوج کے مطابق 4 نومبر 2025 سے اب تک 4910 انٹیلی جنس بیسڈ آپریشنز کیے گئے جن میں 206 دہشتگردوں کو جہنم واصل کیا گیا۔ رواں سال مجموعی طور پر 67023 انٹیلی جنس بیسڈ )آئی بی اوز( کیے گئے جن میں 1873 دہشتگرد مارے گئے، ان میں 136 افغانی شامل ہیں۔ صوبائی تقسیم کے مطابق خیبرپختونخوا میں 12857 جبکہ بلوچستان میں 53309 آپریشنز کیے گئے۔
ڈی جی آئی ایس پی آر لیفٹیننٹ جنرل احمد شریف چوہدری نے سینیئر صحافیوں سے ملکی سلامتی، بارڈر مینجمنٹ، دہشتگردی کے خلاف جاری کارروائیوں اور خطے کی بدلتی صورتحال پر تفصیلی گفتگو کرتے ہوئے اہم انکشافات اور اعداد و شمار پیش کیے ہیں۔
مزید پڑھیں: ڈی جی آئی ایس پی آر نے قوم میں ہلچل مچا دی، جنرل فیض حمید کیس کا آخری باب؟
ڈی جی آئی ایس پی آر نے کہا کہ بارڈر مینجمنٹ کے حوالے سے گمراہ کن پروپیگنڈا کیا جاتا ہے جبکہ پاک افغان سرحد 1229 کلومیٹر کے دشوار گزار علاقوں اور 20 کراسنگ پوائنٹس پر مشتمل ہے۔ متعدد مقامات پر چوکیاں ایک دوسرے سے 20 سے 25 کلومیٹر کے فاصلے پر واقع ہیں، لہٰذا نقل و حرکت کو کنٹرول کرنا بڑا چیلنج ہے۔ انہوں نے بتایا کہ سرحد کے دونوں اطراف منقسم گاؤں صورتحال کو پیچیدہ بناتے ہیں۔
انہوں نے کہا کہ افغان طالبان رجیم دہشتگردوں کی مکمل سہولتکار ہے، اور افغانستان میں مختلف دہشتگرد تنظیموں کے مراکز، قیادت، اسلحہ اور فنڈنگ کے ٹھوس شواہد پاکستان نے مہیا کیے ہیں۔ پاکستان کا مطالبہ ہے کہ طالبان رجیم ایک قابلِ تصدیق میکانزم کے تحت اپنی سرزمین دہشتگردی کے لیے استعمال نہ ہونے دے۔ انہوں نے واضح کیا کہ پاکستان کا مسئلہ افغان عوام سے نہیں، افغان طالبان رجیم سے ہے۔
مزید پڑھیں: ’ہم پاکستانی ہیں اور پاک آرمی ہم میں سے ہے‘ ڈی جی آئی ایس پی آر کا قائداعظم یونیورسٹی کا دورہ
ترجمان نے بتایا کہ رواں برس افغان مہاجرین کی باعزت واپسی کے عمل میں 2024 میں 366,704 جبکہ 2025 میں 971,604 افراد واپس جا چکے ہیں، اور صرف نومبر میں 239,574 افراد کی واپسی عمل میں آئی۔ انہوں نے خبردار کیا کہ کوئی بھی ملک اگر افغان طالبان کو فوجی ساز و سامان دے گا تو یہ براہِ راست دہشتگردوں کے ہاتھ لگے گا۔
ڈی جی آئی ایس پی آر نے کہا کہ ہندوستانی قیادت خود فریبی پر مبنی بیانات دے رہی ہے۔ انہوں نے انڈین آرمی چیف کی جانب سے ’ٹریلر‘ والی بات پر طنز کرتے ہوئے کہا کہ جس ٹریلر میں 7 جہاز گر جائیں، 26 مقامات پر حملہ ہو جائے اور S-400 بیٹریاں تباہ ہو جائیں تو ایسی فلم ان کے لیے ہارر فلم بن جائے گی۔
ڈی جی آئی ایس پی آر نے بتایا کہ پاکستان مخالف بیانیہ بنانے والے بیشتر ایکس اکاؤنٹس بیرون ملک سے چل رہے ہیں۔ پاکستان کی سیاست اور داخلی ماحول کو نشانہ بنانے والے یہ اکاؤنٹس مسلسل زہریلا مواد پھیلا رہے ہیں۔
مزید پڑھیں: بلوچستان میں امن کی کوششیں، ڈی جی آئی ایس پی آر کی طلبا سے گفتگو
نیشنل ایکشن پلان پر عمل درآمد کے حوالے سے انہوں نے کہا کہ بلوچستان میں مربوط نظام وضع کیا جا چکا ہے جبکہ خیبرپختونخوا میں کمی محسوس کی گئی ہے۔ بلوچستان کے 27 اضلاع پولیس کے دائرہ اختیار میں آ چکے ہیں جو صوبے کا 86 فیصد حصہ ہے۔ ایرانی ڈیزل کی اسمگلنگ، جس سے حاصل ہونے والی رقم بی ایل اے اور بی وائے سی جیسے گروہوں تک پہنچتی تھی، آرمی، ایف سی اور حکومت کے مشترکہ کریک ڈاؤن سے 20.5 ملین لیٹر سے کم ہو کر 2.7 ملین لیٹر روزانہ رہ گئی ہے۔
ڈی جی آئی ایس پی آر نے بتایا کہ امریکی افواج کے انخلا کے دوران افغانستان میں 7.2 ارب ڈالر کے فوجی ساز و سامان چھوڑے گئے تھے۔ افغان طالبان رجیم تمام افغان قومیتوں کی نمائندگی نہیں کرتا اور افغانستان کی نصف آبادی یعنی خواتین کی کوئی نمائندگی اس رجیم میں موجود نہیں۔ پاکستان کا مسئلہ افغان عوام سے نہیں بلکہ افغان طالبان رجیم کے رویے سے ہے۔
مزید پڑھیں: اس بار ہم ہندوستان کے مشرق سے آغاز کریں گے، ڈی جی آئی ایس پی آر کا دی اکانومسٹ کو انٹرویو
ڈی جی آئی ایس پی آر نے کہا کہ نان کسٹم پیڈ گاڑیاں نہ صرف غیر قانونی اسمگلنگ میں استعمال ہوتی ہیں بلکہ پولیٹیکل ٹیرر کرائم نیکسز کا حصہ ہیں جو خودکش حملوں میں استعمال ہوتی ہیں- جن کی روک تھام ملکی سلامتی کے لیے انتہائی ضروری ہے۔
ڈی جی آئی ایس پی آر نے دو ٹوک مؤقف اپناتے ہوئے کہا کہ ہمارے لیے اچھے یا برے دہشتگرد میں کوئی تفریق نہیں، ہمارے لیے اچھا دہشتگرد وہ ہے جو جہنم واصل ہوچکا ہے۔ انہوں نے یقین دلایا کہ حق ہمیشہ غالب آتا ہے اور پاکستان حق پر ہے۔
