بھارتی فلم اور ٹی وی کے مشہور اداکار آدتیہ سنگھ راجپوت ممبئی میں واقع اپنے گھر کے باتھ روم میں مردہ پائے گئے۔
بھارتی میڈیا کے مطابق 32 سالہ آدتیہ ممبئی کے علاقے اندھیری میں ایک عمارت کی 11 ویں منزل پر واقع اپنے اپارٹمینٹ کے باتھ روم میں پراسرار حالت میں ملے جنہیں ان کے دوستوں اور چوکیدار نے دیکھا اور انہیں فوراً اسپتال لے گئے۔
اسپتال لے جانے پر ڈاکٹروں نے مردہ قرار دیا۔ آدتیہ نے ‘کرانتی ویر’ اور ‘میں نے گاندھی کو نہیں مارا’ جیسی فلموں میں کام کیا۔ انہوں نے اپنے کیریئر کا آغاز 17 سال کی عمر سے بطور ماڈل کیا تھا۔ وہ ٹی وی شو ’اسپلٹس ولا‘ سے بھی مقبول ہوئے تھے۔
میڈیا رپورٹس میں کہا جا رہا ہے کہ منشیات کا اوور ڈوز بھی ان کی موت کی ایک وجہ ہو سکتی ہے۔
اداکار کی انسٹاگرام اسٹوری سے پتا چلتا ہے کہ وہ گزشتہ شب اپنے دوستوں کے ساتھ گھر میں ہی موجود تھے۔
آدتیہ کے دوست سبیاساچی کا کہنا ہے کہ کہ وہ اچھا کام کر رہے تھے اور ان کے برانڈز اچھی کارکردگی کا مظاہرہ کر رہے تھے۔ ان کا مزید کہنا تھا کہ آدتیہ ٹی وی پر زیادہ کام نہیں کر رہے تھے لیکن ان کا برانڈ چل گیا تھا۔
آدتیہ سنگھ راجپوت نے اپنے کیریئر کا آغاز بطور ماڈل کرنے کے بعد انہوں نے فلموں اور ٹی وی شوز میں کام کیا۔ بعد ازاں انہوں نے بطور کاسٹنگ ڈائریکٹر بھی کام کرنا شروع کیا۔ انہوں نے بطور ماڈل سینکڑوں اشتہارات میں کام کیا۔
