کراچی میں پولیس نے خفیہ اطلاع پر بڑی کارروائی کرتے ہوئے کروڑوں روپے مالیت کے نان کسٹم پیڈ موبائل فونز کی کھیپ برآمد کرلی۔
ایس ایس پی کیماڑی امجد احمد شیخ کے مطابق پولیس نے کارروائی کے دوران ایک آلٹو کار سے 170 کے قریب نان کسٹم آئی فون اورمختلف برانڈز کے اینڈرائیڈ فون قبضے میں لیے ہیں۔
یہ بھی پڑھیں:کراچی کسٹمز نے بھارت سے درآمد شدہ ممنوعہ سامان کی اسمگلنگ ناکام بنا دی
ترجمان کے مطابق کارروائی میں 2 ملزمان سجاد اور نورحسن کو گرفتار کرلیا گیا ہے، جنہوں نے ابتدائی تفتیش میں بلوچستان سے کراچی نان کسٹم موبائل فونز اسمگل کرنے کا انکشاف کیا ہے۔
پولیس نے اسمگلنگ میں استعمال ہونے والی آلٹو کار بھی اپنی تحویل میں لے لی ہے۔
ایس ایس پی کیماڑی نے بتایا کہ گرفتار ملزمان کے خلاف مزید قانونی کارروائی جاری ہے اور اسمگلنگ کے اس نیٹ ورک کے دیگر کرداروں تک پہنچنے کے لیے تفتیش کو وسیع کیا جارہا ہے۔
مزید پڑھیں: پاکستان کسٹمز نے 2 کروڑ 5 لاکھ روپے مالیت کے 20 ہزار کلو چائنا نمک کی اسمگلنگ ناکام بنادی
واضح رہے کہ پاکستان میں نان کسٹم موبائل فونز کی اسمگلنگ ایک عرصے سے سیکیورٹی اداروں کے لیے چیلنج بنی ہوئی ہے، جس کے ذریعے نہ صرف قومی خزانے کو لاکھوں روپے کی کسٹم ڈیوٹی کا نقصان ہوتا ہے بلکہ غیر قانونی تجارت کے باعث مقامی مارکیٹ کا توازن بھی متاثر ہوتا ہے۔
