چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر این آئی (ایم)، ایچ جے، چیف آف نیول اسٹاف ایڈمرل نوید اشرف این آئی، این آئی (ایم) اور چیف آف ایئر اسٹاف ایئر چیف مارشل ظہیر احمد بابر سدھو این آئی (ایم)، ایچ جے نے مسلح افواج کی جانب سے سوار محمد حسین شہید نشانِ حیدر کی 54ویں برسی پر گہرے احترام اور قومی فخر کے ساتھ خراجِ عقیدت پیش کیا ہے۔
یہ بھی پڑھیں:چیف آف ڈیفنس فورسز فیلڈ مارشل جنرل عاصم منیر کا افغان طالبان رجیم کو انتباہ: کیا یہ پالیسی میں نیا موڑ ہے؟
اس موقع پر مسلح افواج نے 1971 کی جنگ کے ظفر وال، شکر گڑھ سیکٹر میں سوار محمد حسین شہید کی غیر معمولی بہادری کو یاد کرتے ہوئے کہا کہ انہوں نے دشمن کی پیشقدمی کرتی بکتر بند گاڑیوں کی نشاندہی کی اور ری کوئلس رائفلز کے عملے کی نہایت درست رہنمائی کی۔
ان کی جرأت مندانہ کارروائیوں کے نتیجے میں متعدد دشمن ٹینک تباہ ہوئے اور محاذ کا نقشہ پلٹ گیا۔ اسی دوران وہ دشمن کی فائرنگ کا نشانہ بن کر جامِ شہادت نوش کر گئے اور وطن پر بے مثال قربانی کی لازوال داستان رقم کی۔
سوار محمد حسین شہید کی قربانی پاکستان کی مسلح افواج کے اس عزم کی علامت ہے کہ وطن کی خودمختاری کے تحفظ کے لیے ہر قیمت ادا کی جائے گی۔ ان کی بہادری آج بھی نوجوان سپاہیوں کے لیے مشعلِ راہ ہے۔
قومی سطح پر اس عظیم فرزندِ وطن کو خراجِ عقیدت پیش کرتے ہوئے اس عزم کا اعادہ کیا گیا کہ مادرِ وطن کی سلامتی اور استحکام کے لیے جان نثار کرنے والے تمام شہدا کے ایثار اور بہادری کو ہمیشہ یاد رکھا جائے گا۔
