بھارتی پولیس نے کہا ہے کہ آسٹریلیا کے شہر بونڈی بیچ میں فائرنگ کے واقعے میں ہلاک ہونے والا حملہ آور ساجد اکرم اصل میں بھارتی ریاست تلنگانہ کے حیدرآباد کا رہائشی تھا، تاہم اس کا اپنے خاندان سے رابطہ محدود تھا۔
مزید پڑھیں: بھارتی میڈیا کو ایک اور شرمندگی، سڈنی حملے میں ملوث شہری کے بھارتی ہونے کا اعتراف کرلیا
پولیس کے مطابق 50 سالہ ساجد اکرم پولیس کی فائرنگ سے ہلاک ہوا، جبکہ اس کا 24 سالہ بیٹا اور مبینہ ساتھی نوید اکرم گولی لگنے کے بعد اسپتال میں تشویشناک حالت میں زیرِ علاج ہے۔
ریاست تلنگانہ کی پولیس نے اپنے بیان میں کہاکہ اہلِ خانہ نے واضح کیا ہے کہ انہیں ساجد اکرم کے مبینہ شدت پسندانہ خیالات یا سرگرمیوں کے بارے میں علم نہیں تھا اور نہ ہی وہ جانتے تھے کہ کس سبب سے اس میں انتہا پسندی پیدا ہوئی۔
آسٹریلوی پولیس کے مطابق باپ اور بیٹے نے گزشتہ ماہ فلپائن کا سفر کیا تھا، جہاں والد بھارتی پاسپورٹ اور بیٹے نے آسٹریلوی پاسپورٹ استعمال کیا۔ حکام اس سفر کے مقصد کی تحقیقات کر رہے ہیں اور ابھی تک یہ ثابت نہیں ہو سکا کہ دونوں کا کسی دہشت گرد تنظیم سے تعلق تھا یا انہوں نے وہاں کوئی تربیت حاصل کی۔
مزید پڑھیں: سڈنی واقعہ: آسٹریلوی ایجنسیوں نے تحقیقات کے لیے بھارت سے رابطہ کرلیا
تلنگانہ پولیس نے مزید بتایا کہ ساجد اکرم 1998 میں آسٹریلیا منتقل ہونے کے بعد چھ مرتبہ بھارت آیا، جو زیادہ تر خاندانی وجوہات کی بنیاد پر تھے، اور بھارت چھوڑنے سے قبل اس کے خلاف کوئی منفی یا مجرمانہ ریکارڈ موجود نہیں تھا۔
یاد رہے کہ 2 روز قبل سڈنی کے معروف بونڈی بیچ پر فائرنگ کے ایک ہولناک واقعے میں حملہ آور سمیت 16 افراد ہلاک اور 40 سے زیادہ زخمی ہو گئے تھے۔
