سندھ ہائیکورٹ میں حکومتِ سندھ کے خلاف دائر ایک آئینی درخواست میں ماس ٹرانزٹ منصوبوں کے ذریعے عوام پر ’ناقابل برداشت مالی بوجھ‘ ڈالنے کو چیلنج کیا گیا ہے۔
اشفاق علی پنہور ایڈووکیٹ کی جانب سے دائر اس درخواست میں حکومتِ سندھ، وزیراعلیٰ سندھ اور دیگر متعلقہ حکام کو فریق بنایا گیا ہے۔
درخواست میں ماس ٹرانزٹ منصوبوں کے لیے غیر قانونی، غیر شفاف، ضرورت سے زیادہ اور من مانے ملکی و غیر ملکی قرضوں کے حصول، ان کے مبینہ غلط استعمال، بدانتظامی، منصوبوں کی تکمیل میں ناکامی اور عوام پر ناقابلِ برداشت مالی بوجھ ڈالنے کو چیلنج کیا گیا ہے۔
یہ بھی پڑھیں: کراچی کو عالمی معیار کا شہر بنانے کا عزم، سندھ حکومت کی ایف ڈبلیو او سے شراکت داری
درخواست گزار کا مؤقف ہے کہ ریڈ لائن، یلو لائن، گرین لائن، اورنج لائن اور پیپلز بس سروس کے منصوبوں کے لیے حکومتِ سندھ نے بین الاقوامی مالیاتی اداروں اور دیگر ذرائع سے بھاری غیر ملکی اور ملکی قرضے حاصل کیے۔
جن کی مجموعی مالیت 600 ملین امریکی ڈالر سے زائد بنتی ہے، جو پاکستانی کرنسی میں تقریباً 170 سے 200 ارب روپے کے برابر ہے۔ ان قرضوں کی تفصیلات کبھی بھی شفاف انداز میں عوام کے سامنے نہیں لائی گئیں۔
’یہ قرضے گرانٹ نہیں بلکہ سود پر حاصل کیے گئے ہیں، جن کی ادائیگی بالآخر ٹیکسوں میں اضافے، عوامی سہولیات میں کمی اور بڑھتے ہوئے مالی دباؤ کی صورت میں سندھ کے عوام پر ڈال دی جاتی ہے۔‘
مزید پڑھیں: سندھ حکومت کا ٹائر جلانے اور پائرو لائسز پلانٹس پر مکمل پابندی کا فیصلہ
درخواست میں کہا گیا ہے کہ بسیں چلانا بنیادی طور پر ایک تجارتی اور نجی معاشی سرگرمی ہے اور اگر حکومت قرضوں سے چلنے والے منصوبوں کے ذریعے اس شعبے میں اجارہ داری قائم کرتی ہے تو یہ آئین کے آرٹیکل 18 کے تحت شہریوں کے روزگار اور کاروبار کے حق کی خلاف ورزی ہے۔
’اس پالیسی کے نتیجے میں چھوٹے ٹرانسپورٹرز اور نجی کاروباری افراد متاثر ہو رہے ہیں، بے روزگاری میں اضافہ ہو رہا ہے اور عوام کے لیے آمدنی کے مواقع محدود ہو رہے ہیں۔‘
درخواست گزار کے مطابق اس پورے نظام سے ٹھیکیداروں، مشیروں اور چند سرکاری عہدیداروں کو فائدہ پہنچتا ہے، جبکہ عام شہری نہ مناسب سفری سہولت حاصل کر پاتے ہیں اور نہ ہی معاشی ریلیف ان کا مقدر بنتا ہے۔
مزید پڑھیں: ٹیکس کا سارا بوجھ عوام پر، لوگوں کے لیے آسانیاں پیدا کریں گے تو کام چلیں گے، سپریم کورٹ
درخواست گزار کا کہنا ہے کہ جوابدہندگان کے یہ اقدامات آئین کے آرٹیکل 4 کی خلاف ورزی ہیں، جو قانون کے مطابق سلوک کے حق کی ضمانت دیتا ہے۔
’شفافیت اور جوابدہی کے بغیر من مانے قرضے لینا آرٹیکل 9 اور 23 کے بھی منافی ہے، کیونکہ اس سے عوام کے معاشی تحفظ اور جائیداد کے حقوق کو خطرہ لاحق ہوتا ہے۔‘
درخواست گزار کے مطابق قرضوں کے ذریعے ٹرانسپورٹ کے شعبے میں اجارہ داری قائم کرنا آرٹیکل 18 کی صریح خلاف ورزی ہے، جبکہ عوامی فنڈز کا مبینہ غلط استعمال پبلک ٹرسٹ اور گڈ گورننس کے اصولوں کے بھی خلاف ہے۔
مزید پڑھیں: وزیراعلیٰ سندھ کو ہٹانے سے متعلق خبروں میں کتنی صداقت ہے؟
’بھاری قرضوں کے باوجود منصوبوں کی تکمیل میں ناکامی کو غیر قانونی، غیر آئینی اور عدالتی نظرِثانی کے قابل قرار دیا گیا ہے۔‘
درخواست میں عدالت سے استدعا کی گئی ہے کہ وہ قرار دے کہ شفافیت، جوابدہی اور منصوبوں کی بروقت تکمیل کے بغیر بی آر ٹی اور ماس ٹرانزٹ منصوبوں کے لیے قرض لینا غیر آئینی اور غیر قانونی ہے۔
درخواست مین استدعا کی گئی ہے کہ عدالت حکومت کو ہدایت دے کہ حاصل کیے گئے تمام قرضوں کی مکمل تفصیلات، بشمول رقم، شرحِ سود، ادائیگی کا شیڈول اور فنڈز کے استعمال کی تفصیل، ریکارڈ پر پیش کی جائیں۔
مزید پڑھیں: سندھ بجٹ : سرکاری ملازمین کی تنخواہوں میں 12 فیصد، پنشن میں 8 فیصد اضافہ
’فنڈز کے استعمال، بسوں کی خریداری اور دیے گئے ٹھیکوں کی آزادانہ آڈٹ اور انکوائری کا حکم دیا جائے، جبکہ مکمل شفافیت یقینی بننے تک مزید قرض لینے سے روکا جائے۔‘
درخواست میں یہ بھی استدعا کی گئی ہے کہ حکومت بسوں کی خریداری، قرض کی رقم اور بسوں کی روزانہ آمدنی کی تفصیلات بھی فراہم کی جائے۔
اس آئینی درخواست کی سماعت سندھ ہائیکورٹ میں 20 جنوری کو مقرر ہے۔
