انڈونیشیا میں ایک علاقائی مسافر طیارہ گر کر تباہ ہو گیا، جس میں سوار تمام 11 افراد ہلاک ہو گئے۔ حادثے میں 3 مسافر اور 8 عملے کے ارکان شامل تھے۔
میڈیا رپورٹس کے مطابق طیارہ یوگیا کارتا سے مکاسر، جنوبی سولاویسی کے لیے روانہ ہوا تھا، تاہم قریباً 12 میل قبل ایئرپورٹ کے قریب ایئر ٹریفک کنٹرول سے اس کا رابطہ منقطع ہو گیا۔
ابتدائی اطلاعات کے مطابق طیارے کے ملبے کے آثار ماروس ضلع کے پہاڑی علاقے لیانگ لیانگ میں دیکھے گئے ہیں۔
جائے حادثہ پر فوری طور پر سرچ اور ریسکیو ٹیمیں روانہ کی گئی ہیں، جہاں 60 اہلکار اور ماہرین بچاؤ اور ملبے کی تلاش میں مصروف ہیں۔
انڈونیشیا ایوی ایشن کے ڈائریکٹر کے مطابق طیارہ مقررہ اپروچ پر نہیں تھا اور ایئر ٹریفک کنٹرول نے اسے درست سمت میں لانے کی ہدایات دی تھیں، لیکن رابطہ ختم ہو جانے کے بعد ایمرجنسی کا اعلان کیا گیا۔
