میانوالی میں چاپڑی ڈیم کے قریب کاؤنٹر ٹیررازم ڈپارٹمنٹ (سی ٹی ڈی) کی کارروائی کے دوران 6 خطرناک دہشتگرد اپنی ہی ساتھیوں کی فائرنگ سے ہلاک ہو گئے۔ آپریشن کے دوران 8 دیگر دہشتگرد فرار ہونے میں کامیاب ہوئے، جبکہ دہشتگردوں سے ہتھیار اور بارودی مواد بھی برآمد ہوا۔
یہ بھی پڑھیں:صدر زرداری کا بلوچستان میں دہشتگردوں کے خلاف کامیاب آپریشن پر سی ٹی ڈی کو خراجِ تحسین
سی ٹی ڈی کے ترجمان کے مطابق یہ چھاپہ دہشتگردوں کی گرفتاری کے لیے مارا گیا، لیکن اسی دوران دہشتگردوں نے سی ٹی ڈی ٹیم پر فائرنگ کر دی۔ فائرنگ کے تبادلے میں 6 دہشتگرد اپنی ہی ساتھیوں کی گولیاں لگنے سے ہلاک ہوئے۔
کارروائی کے دوران فرار ہونے والے 8 دہشتگردوں کی گرفتاری کے لیے بھی متعلقہ ادارے بھرپور کوششیں کر رہے ہیں تاکہ علاقے میں سلامتی کو یقینی بنایا جا سکے۔
سی ٹی ڈی حکام نے بتایا کہ ہلاک دہشتگردوں سے ایک خودکش جیکٹ، 3 دستی بم، 3 ایس ایم جیز، 200 گولیاں اور دیگر بارودی مواد برآمد ہوا ہے۔ ہلاک ہونے والے دہشتگردوں کی شناخت کا عمل جاری ہے۔
سی ٹی ڈی کے ترجمان نے مزید کہا کہ آپریشن علاقے میں امن و امان کی بحالی اور دہشتگردوں کی موجودگی ختم کرنے کے لیے جاری اقدامات کا حصہ ہے، اور فرار دہشتگردوں کی تلاش میں بھی خصوصی ٹیمیں تعینات کی گئی ہیں۔
