پنجاب حکومت نے صوبہ بھر میں جاری تعمیراتی منصوبوں پر حفاظتی اقدامات مزید مؤثر بنانے کا فیصلہ کرلیا گیا ہے، صوبائی وزیر تعمیرات و مواصلات ملک صہیب احمد بھرتھ نے اس حوالے سے محکمہ سی اینڈ ڈبلیو کے افسران کو واضح ہدایات جاری کردی ہیں۔
یہ بھی پڑھیں: ستھرا پنجاب پراجیکٹ کی بین الاقوامی پذیرائی جاری، برمنگھم کے والنٹیئرز نے رہنمائی حاصل کی
صوبائی وزیر کے مطابق تمام تعمیراتی سائٹس پرغیر متعلقہ افراد کے داخلے کو روکنے کے لیے مضبوط اور محفوظ باڑ لگائی جائے گی، ہر تعمیراتی مقام پر وارننگ سائن، حفاظتی ہدایات اور ایمرجنسی ٹیلی فون نمبرز نمایاں طور پر آویزاں کرنے کی بھی ہدایت کی گئی ہے۔
ملک صہیب احمد بھرتھ نے کہا ہے کہ تعمیراتی سائٹس پر رات کے وقت مناسب لائٹنگ کا انتظام یقینی بنایا جائے جبکہ کھدائی کے مقامات کے گرد مکمل حفاظتی انتظامات کیے جائیں، انہوں نے واضح کیا کہ تعمیراتی سائٹس پر کام کرنے والے تمام مزدوروں کے لیے حفاظتی سامان کا استعمال لازمی ہوگا۔
یہ بھی پڑھیں: راولپنڈی میں الیکٹرک بس پروجیکٹ کا افتتاح: 1100 بسیں دسمبر تک سڑکوں پر ہونگی، مریم نواز
صوبائی وزیر نے تمام چیف انجینئرز کو ہدایت دی ہے کہ وہ حفاظتی اقدامات پر عمل درآمد کا سرٹیفکیٹ 3 فروری تک جمع کروائیں۔ اس حوالے سے محکمہ سی اینڈ ڈبلیو کی جانب سے تمام متعلقہ افسران کو باضابطہ نوٹیفکیشن بھی جاری کر دیا گیا ہے۔
