ایران کے 2 مختلف شہروں میں ہونے والے دھماکوں کے نتیجے میں کم از کم 5 افراد ہلاک اور 10 سے زیادہ زخمی ہو گئے ہیں۔
غیرملکی میڈیا رپورٹس کے مطابق ایران کے خلیجی ساحلی شہر بندر عباس میں ہفتے کو ایک رہائشی عمارت میں دھماکا ہوا، جس کی وجہ ابھی تک معلوم نہیں ہو سکی۔
سرکاری میڈیا کے مطابق یہ دھماکا معلم بلیوارڈ کے علاقے میں واقع 8 منزلہ عمارت میں ہوا، جس کے نتیجے میں عمارت کی 2 منزلیں منہدم ہو گئیں اور کئی گاڑیاں اور قریبی دکانیں بھی متاثر ہوئیں۔
ایرانی حکام کے مطابق اس واقعے میں ایک شخص ہلاک اور 14 افراد زخمی ہوئے۔
اسی دوران ایران کے شہر اہواز میں ایک 4 منزلہ رہائشی عمارت میں گیس کے دھماکے نے ایک ہی خاندان کے 4 افراد کی جان لے لی۔
تاہم عمارت کے ملبے تلے دبے 3 سالہ بچے اور ایک خاتون کو بچا لیا گیا ہے۔
ایرانی میڈیا نے اس دھماکے میں پاسداران انقلاب کے کمانڈر کو نشانہ بنانے کے تاثر کی تردید کی ہے، جبکہ اسرائیلی عہدیداروں نے واضح کیا ہے کہ یہ دھماکے اسرائیل کی طرف سے نہیں کیے گئے۔
