وزیرخزانہ اسحاق ڈار صحافیوں کے سوالات پر طیش میں آ گئے اور آئی ایم ایف سے معاہدہ نہ ہونے پر ناکامی کے سوال پر جھُنجَھلا کر کہا ’کیا پاکستان ڈیفالٹ ہو گیا ہے‘؟
اسلام آباد میں منعقدہ اسلامک کیپٹل مارکیٹس نامی عالمی کانفرنس میں پاکستان کی معاشی ترقی پر زوردار بھاشن دینے کے بعد جب وزیر خزانہ وہاں سے جلدی میں روانہ ہوئے تو چلتے چلتے ہی صحافیوں نے سوالات کی بوچھاڑ کر دی، ایک صحافی نے پوچھا ’آپ کو پہلی بار مشکل معاشی حالات ملے اور آپ معیشت سنبھال نہیں پا رہے‘، ہنس کر ٹالتے اور تیز تیز قدم اٹھاتے ہوئے اسحاق ڈار کے قدم اس وقت رک گئے جب ایک صحافی نے سوال کیا کہ’کیا آئی ایم ایف سے معاہدہ نہ ہونا آپ کی ناکامی ہے‘؟ اس پر انہوں نے پر جھُنجَھلا کر کہا ’کیا پاکستان ڈیفالٹ ہو گیا ہے‘؟
گاڑی میں براجمان ہونے سے پہلے دروازہ تھامتے ہوئے اسحاق ڈار نے کہا کہ ’آپ نے جو فیصلہ دینا ہے دے دیں، ہم نے ہر عالمی ادائیگی کی ہے‘۔ اس کے بعد وہ گاڑی میں بیٹھ کر روانہ ہو گئے۔
