برطانوی ریپر فنکار سینٹرل سی نے انکشاف کیا ہے کہ ان کے جوتوں کا قیمتی ذخیرہ چوری ہو گیا ہے، جس سے انہیں بڑا نقصان اٹھانا پڑا۔ یہ واقعہ ایسے وقت پیش آیا جب وہ نائکی کے ساتھ اپنی متوقع شراکت داری کی تیاری کر رہے ہیں۔
6 فروری کو انسٹاگرام پر جاری بیان میں ریپر نے بتایا کہ ان کے اسٹوریج یونٹ کو نشانہ بنایا گیا، جہاں گزشتہ 12 برسوں سے جمع کیا گیا جوتوں کا کلیکشن رکھا ہوا تھا۔ ان کے مطابق اس کلیکشن کی مالیت ہزاروں پاؤنڈز تھی۔
یہ بھی پڑھیے: گرامیز 2026 کے بڑے ایوارڈز کن فنکاروں نے جیت لیے؟
سینٹرل سی نے لکھا کہ ان کے پاس 2015 میں حاصل کیا گیا پہلا نائکی آئی ڈی ایئر فورس ون بھی موجود تھا، جو اب چوری ہو چکا ہے۔ انہوں نے اس نقصان پر افسوس کا اظہار کرتے ہوئے مداحوں سے اپیل کی کہ جب ان کا نیا جوتا مارکیٹ میں آئے تو اسے ضرور خریدیں۔
ریپر نائکی اور اپنے اسٹریٹ ویئر برانڈ سِینا ورلڈ کے اشتراک سے ‘Central Cee x Syna World x Nike Air Force 1 Racer Blue’ کے نام سے نیا جوتا متعارف کروا رہے ہیں، جس کی رونمائی 2026 کے موسم بہار میں متوقع ہے۔
یہ بھی پڑھیے: دکی میں اسسٹنٹ کمشنر آفس کے مال خانے سے 270 کلو منشیات چوری
انہوں نے سوشل میڈیا پر ایک تصویر بھی شیئر کی جس میں اسٹوریج یونٹ تباہ حال دکھائی دے رہا ہے اور خالی ڈبے فرش پر بکھرے ہوئے ہیں۔ یہ خبر ایسے وقت سامنے آئی جب سینٹرل سی نے ایک لائیو اسٹریمنگ سیشن میں انکشاف کیا کہ انہوں نے اسلام قبول کر لیا ہے اور اپنا نام بھی تبدیل کر لیا ہے۔
اوکلی نیل سیزر سو کے نام سے پیدا ہونے والے ریپر نے بتایا کہ انہوں نے اپنا پہلا نام تبدیل کر کے ‘اخیل’ رکھ لیا ہے۔
