اسلام آباد میں اب بغیر رجسٹریشن ٹیکسی اور بائیک سروسز چلانے والوں کے خلاف سخت کارروائی ہوگی۔ ضلعی انتظامیہ نے تمام آن لائن ٹیکسی سروسز کی باضابطہ رجسٹریشن کا فیصلہ کیا ہے، جس کے تحت تمام ڈرائیورز اور گاڑیوں کی معلومات جمع کی جائیں گی۔
مزید پڑھیں: اسلام آباد دہشتگردی: خود کش حملہ آور کی والدہ اسلام آباد سے گرفتار
ایڈیشنل ڈپٹی کمشنر ایسٹ کو ہدایت دی گئی ہے کہ وہ تمام ٹیکسی سروسز کے سی ای اوز سے رابطہ کریں، جبکہ سیکریٹری اسلام آباد ٹرانسپورٹ اتھارٹی غیر رجسٹرڈ بائیک چلانے والوں کے خلاف کریک ڈاؤن کریں۔
ڈی سی اسلام آباد کے مطابق، تمام غیر رجسٹرڈ گاڑیوں اور بائیک کی رجسٹریشن ڈیجیٹل آٹومیشن کے تحت کی جائے گی اور پولیس کو بھی تمام ڈیٹا تک رسائی حاصل ہوگی۔
رجسٹریشن کے بعد ڈرائیور کے لیے یہ لازمی ہوگا کہ وہ مسافروں کی تفصیلات ایپ پر اپلوڈ کرے، اور مسافر کے شناختی کارڈ نمبر کے اندراج کے بغیر کسی کو سواری نہ لے۔ ڈی سی اسلام آباد کی ہدایت پر کل سے باضابطہ رجسٹریشن کا آغاز کیا جائے گا۔
