اسلامی نظریاتی کونسل نے رمضان 2026 کے لیے ملک بھر میں زکوٰۃ الفطر اور فدیہ کی نئی رقوم کا اعلان کردیا ہے۔ کونسل کے چیئرمین ڈاکٹر راغب حسین نعیمی کے مطابق گندم کے حساب سے فطرانہ اور فدیہ کی کم از کم رقم 300 روپے فی کس مقرر کی گئی ہے۔
کونسل کی جانب سے جاری تفصیلات کے مطابق مختلف اجناس کے حساب سے فطرانہ اور فدیہ کی رقوم اس طرح ہوں گی۔
یہ بھی پڑھیں: رمضان المبارک اور عیدالفطر 2026 کی ممکنہ تاریخیں سامنے آگئیں
جو افراد جو کے حساب سے فطرانہ یا فدیہ ادا کرنا چاہیں گے، ان کے لیے رقم ایک ہزار 100 روپے فی کس مقرر کی گئی ہے۔
کھجور کے حساب سے یہ رقم ایک ہزار 600 روپے فی کس ہوگی۔
کشمش کے حساب سے فطرانہ اور فدیہ 3 ہزار 800 روپے فی کس مقرر کیا گیا ہے۔
جبکہ منقہ (خشک انجیر) کے حساب سے فطرانہ اور فدیہ 5 ہزار 400 روپے فی کس ادا کرنا ہوگا۔
فدیہ کی رقوم
جو افراد پورا رمضان روزے رکھنے سے قاصر ہوں، ان کے لیے 30 دن کا فدیہ درج ذیل ہوگا۔
گندم کے حساب سے 9 ہزار روپے
جو کے حساب سے 33 ہزار روپے
کھجور کے حساب سے 48 ہزار روپے
کشمش کے حساب سے ایک لاکھ 14 ہزار روپے
منقہ کے حساب سے ایک لاکھ 62 ہزار روپے
سرکاری سبسڈی آٹے پر فدیہ
اسلامی نظریاتی کونسل کے مطابق سرکاری سبسڈی والے آٹے کے حساب سے پورے ماہ کا فدیہ 6 ہزار روپے جبکہ فی کس فطرانہ یا فدیہ 200 روپے مقرر کیا گیا ہے۔
یہ بھی پڑھیں: پنجاب حکومت کا رمضان المبارک میں عوام کو بڑا ریلیف دینے کا فیصلہ
ڈاکٹر راغب حسین نعیمی نے واضح کیا کہ زکوٰۃ الفطر ہر مسلمان پر لازم ہے، چاہے مرد ہو یا عورت، بڑا ہو یا بچہ۔ انہوں نے یہ بھی بتایا کہ جان بوجھ کر روزہ توڑنے کی صورت میں کفارہ ادا کرنا ضروری ہے، جو یا تو مسلسل 60 روزے رکھنے یا 60 مسکین افراد کو دو وقت کا کھانا کھلانے کی صورت میں ادا کیا جا سکتا ہے۔
