وزیر اعلیٰ خیبر پختونخوا محمد سہیل آفریدی نے کہا ہے کہ صوبے کے نوجوانوں میں ٹیلنٹ کی کوئی کمی نہیں، اصل ضرورت انہیں آگے بڑھنے کے لیے مواقع فراہم کرنے کی ہے۔
پشاور میں یونیورسٹی آف انجینئرنگ اینڈ ٹیکنالوجی کے کانووکیشن سے خطاب کرتے ہوئے وزیر اعلیٰ نے کہا کہ خیبر پختونخوا طویل عرصے تک بدامنی کا شکار رہا۔
’جس کے باعث نوجوانوں کو تعلیمی اور پیشہ ورانہ مواقع سے محروم رکھا گیا، تاہم اب حکومت اس صورتحال کو بدلنے کے لیے سنجیدہ اقدامات کر رہی ہے۔‘
یہ بھی پڑھیں: وزیراعلیٰ خیبرپختونخوا سہیل آفریدی کی حالیہ سرگرمیاں و بیانات، کیا وہ ’گڈ بوائے‘ بن گئے؟
انہوں نے کہا کہ جدید اصلاحات کے ذریعے صوبے کے نظامِ تعلیم کو عصری تقاضوں سے ہم آہنگ کیا جا رہا ہے اور نوجوانوں کی تعلیم، تحقیق اور روزگار کے مواقع پر خطیر وسائل خرچ کیے جا رہے ہیں۔
حکومت کی بھرپور کوشش ہے کہ صوبے کا کوئی نوجوان بے روزگار نہ رہے۔
وزیر اعلیٰ سہیل آفریدی نے واضح کیا کہ صوبے کے عوام کے حقوق پر کسی قسم کا سمجھوتہ قبول نہیں کیا جائے گا۔
مزید پڑھیں:مجھے نااہل کرانے کی کوششیں ہو رہی ہیں، وزیراعلیٰ خیبرپختونخوا سہیل آفریدی کا دعویٰ
انہوں نے کہا کہ وہ کسی ذاتی مفاد یا سیاسی فائدے کے لیے نہیں بلکہ صرف صوبے اور عوام کے حقوق کے لیے ہر فورم پر آواز بلند کریں گے۔
امن و امان کی صورتحال پر بات کرتے ہوئے وزیر اعلیٰ نے کہا کہ امن کے بغیر ترقی اور خوشحالی ممکن نہیں۔ خیبر پختونخوا اب مزید کسی تجربہ گاہ کا متحمل نہیں ہو سکتا۔
انہوں نے بتایا کہ اس سلسلے میں وزیر اعظم شہباز شریف سے ملاقات ہو چکی ہے، ایپکس کمیٹی کا اجلاس بھی طلب کیا جا چکا ہے، جبکہ آج بھی سیکیورٹی اداروں اور فورسز کے نمائندوں کے ساتھ ایک اہم اجلاس منعقد ہو رہا ہے۔
مزید پڑھیں: وزیراعظم شہباز شریف سے وزیراعلیٰ خیبرپختونخوا سہیل آفریدی کی پہلی اہم ملاقات، کیا کچھ زیر بحث آیا؟
وزیر اعلیٰ نے کہا کہ بند کمروں میں کیے گئے مسلط شدہ فیصلے ہمیشہ مسائل کو جنم دیتے ہیں، وفاق کے ذمے صوبے کے اربوں روپے واجب الادا ہیں، مگر اس پر سنجیدگی کا مظاہرہ نہیں کیا جا رہا۔
انہوں نے کہا کہ تیراہ متاثرین کے لیے 4 ارب روپے مختص کرنے پر بلاجواز ہنگامہ کھڑا کیا گیا، جبکہ آئی ایم کی رپورٹ میں 5300 ارب روپے کی کرپشن کی نشاندہی کے باوجود کسی نے سوال نہیں اٹھایا۔
سہیل آفریدی نے نوجوانوں اور صوبے کے عوام کو یقین دلاتے ہوئے کہا کہ وہ کبھی اپنی ذات یا سیاست کے لیے کسی کے در پر نہیں جائیں گے۔
مزید پڑھیں: وفاقی فنڈز کی عدم ادائیگی: وزیراعلیٰ خیبر پختونخوا کا وزیراعظم کو باضابطہ خط
تاہم جہاں بھی صوبے اور عوام کے حقوق کی بات ہو گی، وہاں وہ ہر شخص سے برابری کی سطح پر بیٹھ کر عوام کے مفاد میں بات کریں گے، چاہے ذاتی طور پر اختلاف ہی کیوں نہ ہو۔
انہوں نے دو ٹوک الفاظ میں کہا کہ اگر کوئی یہ سمجھتا ہے کہ دباؤ، دھمکیوں، بند کمروں کے فیصلوں یا عمران خان کے نظریے کے بغیر ان سے کچھ منوایا جا سکتا ہے تو یہ محض ایک خام خیالی ہے۔
