بانی پاکستان تحریک انصاف (پی ٹی آئی) کی ہمشیرہ علیمہ خان نے کہا ہے کہ ٹرائل کے دوران عمران خان نے ان سے کہا تھا کہ اب وہ اپنی آنکھوں میں ڈراپ استعمال کررہے ہیں اور عینک کا نمبر بھی تبدیل کرلیا ہے۔ ان کا علاج ماہر ڈاکٹروں کے ذریعے ہونا چاہیے۔
مزید پڑھیں: سپریم کورٹ نے بانی پی ٹی آئی عمران خان سے فوری ملاقات کی درخواست مسترد کردی
اڈیالہ جیل کے قریب ماربل فیکٹری ناکے پر میڈیا سے گفتگو کرتے ہوئے علیمہ خان نے کہاکہ سلمان صفدر کے باہر آنے تک انہیں ملاقات کے بارے میں کوئی علم نہیں تھا، تاہم سلمان صفدر نے تصدیق کی ہے کہ بانی پی ٹی آئی عمران خان خیریت سے ہیں۔
علیمہ خان نے مزید کہاکہ ملاقات کے بعد زیادہ سوالات نہیں کیے کیونکہ سلمان صفدر کو سپریم کورٹ میں رپورٹ پیش کرنی تھی۔
انہوں نے واضح کیاکہ بانی پی ٹی آئی عمران خان کی صحت کا معاملہ اہم ہے اور علاج ماہر ڈاکٹروں کے ذریعے ہونا چاہیے۔
انہوں نے کہاکہ ڈاکٹر فیصل سلطان اور ڈاکٹر عاصم یوسف کی موجودگی میں ماہر ڈاکٹروں کو بانی پی ٹی آئی عمران خان کی بیماری کی تشخیص اور علاج کرنے کی اجازت دی جائے، کیونکہ انہیں بہترین علاج کی ضرورت ہے۔
مزید پڑھیں: عمران خان سے بیرسٹر سلمان صفدر کی 3 گھنٹے تک ملاقات، صحت سے متعلق حقائق سامنے رکھ دیے
واضح رہے کہ بیرسٹر سلمان صفدر کی آج عمران خان سے ملاقات ہوئی ہے، جس کے بعد انہوں نے کہاکہ عمران خان کی صحت ٹھیک ہے۔ تاہم انہوں نے تفصیلی بات چیت کرنے سے گریز کرتے ہوئے کہاکہ وہ سپریم کورٹ میں اس حوالے سے رپورٹ جمع کرائیں گے۔
