ایف آئی اے کے اینٹی کرپشن سرکل کراچی نے متروکہ وقف املاک بورڈ کے ساتھ مشترکہ کارروائی کرتے ہوئے کراچی کے تجارتی علاقے ایم اے جناح روڈ پر واقع ایک کمرشل جائیداد واگزار کروا لی۔
ترجمان ایف آئی اے کے مطابق یہ کارروائی سپریم کورٹ کے متروکہ وقف املاک سے متعلق سو موٹو کیس اور ون مین کمیشن کی جانب سے جاری کردہ ہدایات کی روشنی میں عمل میں لائی گئی۔
یہ بھی پڑھیں: امریکی شکایت پر صارم برنی کراچی ایئرپورٹ پر گرفتار
کارروائی کے بعد واگزار کرائی گئی جائیداد کو متروکہ وقف املاک بورڈ کے حوالے کر دیا گیا ہے۔
ایف آئی اے کے مطابق واگزار شدہ جائیداد کی تخمینی مالیت تقریباً ایک ارب روپے ہے۔ مذکورہ عمارت پر صارم برنی کی جانب سے مبینہ طور پر غیر قانونی قبضہ کیا گیا تھا۔
مزید پڑھیں:صارم برنی کیخلاف ایف آئی اے کے ہیومن ٹریفکنگ سیل میں درج مقدمہ کیا ہے؟
واضح رہے کہ صارم برنی کے خلاف کم عمر بچوں کی اسمگلنگ کے الزامات کے تحت ایف آئی اے میں مقدمہ درج ہے، جبکہ وہ گزشتہ سال اینٹی ہیومن ٹریفکنگ سرکل کراچی کی جانب سے درج کیے گئے ایک کیس میں جیل میں ہیں۔
ترجمان ایف آئی اے کا کہنا ہے کہ سرکاری اور متروکہ وقف املاک پر غیر قانونی قبضوں کے خلاف کارروائیاں جاری رہیں گی۔
