سابق وزیراعظم اور چیئرمین تحریک انصاف عمران خان نے میڈیکل رپورٹ کی بنیاد پر پریس کانفرنس میں الزامات لگانے پر وفاقی وزیرِصحت عبدالقادر پٹیل کو 10 ارب روپے ہرجانے کا نوٹس بھجوا دیا۔
نوٹس سابق وزیراعظم کے وکیل ابوذر سلمان نیازی کی جانب سے بھجوایا گیا ہے۔ نوٹس میں مطالبہ کیا گیا ہے کہ وزیر صحت عبدالقادر پٹیل 15 روز میں اپنے الزامات واپس لیں اور فوری طور پر چیئرمین تحریک انصاف عمران خان سے غیر مشروط معافی مانگیں۔
نوٹس میں کہا گیا ہے کہ عبدالقادر پٹیل چیئرمین تحریک انصاف کو 10 ارب بطور ہرجانہ ادا کریں جسے شوکت خانم اسپتال میں جمع کروایا جائے گا، عبدالقادر پٹیل نے معافی نہ مانگی تو قانونی کارروائی آگے بڑھائیں گے۔
واضح رہے کہ وفاقی وزیر صحت عبدالقادر پٹیل نے پریس کانفرنس میں کہا تھا کہ عمران خان کے خون اور پیشاب کے نمونوں سے ان کے جسم میں ’ڈرگز‘ پائی گئی ہیں، ان نمونوں میں کتنی کوکین پائی گئی ہے، یہ مکمل تحقیق اور مزید ٹیسٹ مکمل کرکے پبلک کی جائیں گی۔
انہوں نے کہا تھا کہ میں اسمبلی میں بھی کہتا رہا ہوں کہ عمران خان کی دماغی حالت ٹھیک نہیں ہے۔ میں اپیل کرتا ہوں کہ عمران خان کے دماغی توازن کے خراب ہونے کا اعلان کیا جائے۔
