پاکستان اور بھارت کے درمیان کرکٹ کی سب سے بڑی اور سنسنی خیز رقابت ایک بار پھر شائقین کی توجہ کا مرکز بن گئی ہے۔
دونوں ہمسایہ ممالک کے درمیان کشیدہ سیاسی تعلقات کے باعث یہ مقابلہ ہمیشہ خبروں کی زینت بنتا رہا ہے۔ حالیہ دنوں میں پاکستان کی اس میچ میں شرکت پر سوالیہ نشان موجود تھا، تاہم اب میچ کے انعقاد کی تصدیق کے بعد بارش کی صورت میں ایک نئی رکاوٹ سامنے آگئی ہے۔
یہ بھی پڑھیے: عمانی کرکٹر محمد ندیم نے ٹی20 ورلڈکپ میں سست ترین ففٹی کا ریکارڈ برابر کر دیا
اطلاعات کے مطابق کولمبو کے آر پریماداسا اسٹیڈیم میں صبح کے اوقات میں بارش کا امکان 70 فیصد تک ظاہر کیا گیا ہے۔ اگرچہ شام تک موسم صاف ہونے کی توقع ہے، تاہم گیلی آؤٹ فیلڈ اور نمی سے بھرپور پچ دونوں ٹیموں کے لیے مشکلات پیدا کر سکتی ہے۔
اگر میچ بارش کے باعث منسوخ ہوگیا تو کیا ہوگا؟
آئی سی سی کے قوانین کے مطابق اگر بھارت اور پاکستان کا میچ مکمل طور پر بارش کی نذر ہوجاتا ہے اور ایک بھی اوور نہ ہو پاتا، تو دونوں ٹیموں کو ایک، ایک پوائنٹ دے دیا جائے گا۔
مشترکہ پوائنٹس: مکمل واش آؤٹ کی صورت میں دونوں ٹیموں کو ایک ایک پوائنٹ ملے گا۔
ریزرو ڈے: گروپ مرحلے کے میچز کے لیے کوئی ریزرو ڈے مختص نہیں کیا گیا۔
نتیجے کے لیے کم از کم اوورز: میچ کا نتیجہ حاصل کرنے کے لیے دونوں ٹیموں کو کم از کم 5، 5 اوور کھیلنا ضروری ہوں گے۔
نیٹ رن ریٹ (NRR): اگر میچ نہ ہو سکا تو نیٹ رن ریٹ پر کوئی اثر نہیں پڑے گا۔
نیٹ رن ریٹ ٹورنامنٹ میں اگلے مرحلے تک رسائی کے لیے انتہائی اہم عنصر سمجھا جاتا ہے، اس لیے دونوں ٹیمیں اس پہلو پر خاص نظر رکھی ہوئی ہیں۔
ممکنہ اثرات
واش آؤٹ کی صورت میں دونوں ٹیموں کے 3 میچز کے بعد 5، 5 پوائنٹس ہوجائیں گے۔ بھارتی کپتان سوریہ کمار یادیو اور ان کی ٹیم اس صورتحال سے زیادہ متاثر نہیں ہوگی، کیونکہ ان کا نیٹ رن ریٹ (+3.050) خاصا مضبوط ہے۔ بھارت اس سے قبل امریکا کو 29 رنز اور نمیبیا کو 93 رنز سے شکست دے چکا ہے، جس سے اس کی پوزیشن مستحکم ہے۔
یہ بھی پڑھیے: ٹی 20 ورلڈ کپ: پاک بھارت میچ کی تمام سیٹیں بُک، ٹکٹ بلیک میں 4 گنا قیمت پر فروخت
دوسری جانب پاکستانی کپتان سلمان علی آغا اور ان کی ٹیم کے لیے یہ صورتحال تشویش کا باعث ہوسکتی ہے، کیونکہ ان کا نیٹ رن ریٹ (+0.800) نسبتاً کم ہے۔ پاکستان کے لیے یہ دو پوائنٹس نہایت اہم ہیں تاکہ سیمی فائنل کی راہ ہموار کی جا سکے۔
واضح رہے کہ ٹی20 ورلڈ کپ میں ریزرو ڈے صرف ناک آؤٹ مرحلے کے میچز کے لیے مختص ہوتے ہیں، گروپ میچز کے لیے نہیں۔
