لورالائی میں ایف سی ٹریننگ سینٹر میں فرنٹیئر کور بلوچستان (نارتھ) کے 68ویں بیچ (فیز ٹو) کی شاندار پاسنگ آؤٹ پریڈ منعقد ہوئی، جس میں 1104 ریکروٹس نے کامیابی سے تربیت مکمل کی۔ تقریب کے مہمانِ خصوصی انسپکٹر جنرل ایف سی بلوچستان (نارتھ) میجر جنرل محمد عاطف مجتبیٰ تھے۔
یہ بھی پڑھیں:کراچی کے ملیر گیریژن میں طلبا نے پاک آرمی کے ساتھ یادگار دن کیسے گزارا؟
فرنٹیئر کور بلوچستان (نارتھ) کے 68ویں بیچ (فیز ٹو) کی پاسنگ آؤٹ پریڈ ایف سی ٹریننگ سینٹر لورالائی میں منعقد ہوئی، جس میں 1104 ریکروٹس نے پیشہ ورانہ تربیت مکمل کرنے کے بعد باقاعدہ طور پر فورس میں شمولیت اختیار کی۔
تقریب میں انسپکٹر جنرل ایف سی بلوچستان (نارتھ) میجر جنرل محمد عاطف مجتبیٰ نے پریڈ کا معائنہ کیا اور کامیاب ریکروٹس اور ان کے اہلِ خانہ کو مبارکباد دی۔ انہوں نے خطاب کرتے ہوئے کہا کہ تمام نوجوانوں کو اس بات پر فخر ہونا چاہیے کہ وہ ایک ایسے باوقار ادارے کا حصہ بن رہے ہیں جو اپنی شاندار روایات، قربانیوں اور بہادری کے لیے جانا جاتا ہے۔
پاسنگ آؤٹ پریڈ میں نوشکی میں شہید ہونے والے خطیب امشد علی کے والد نواب خان کو بطور مہمانِ خصوصی مدعو کیا گیا، جبکہ ان کی فیملی کی قربانی کو خراجِ عقیدت پیش کیا گیا۔
تقریب میں قبائلی عمائدین، مقامی شخصیات، معزز مہمانوں اور سول سوسائٹی کے نمائندگان نے بھرپور شرکت کی، جس سے ایف سی اور عوام کے درمیان مضبوط تعلقات اور باہمی اعتماد کی فضا مزید مستحکم ہوئی۔
یہ بھی پڑھیں:پاک فوج کے خلاف پروپیگنڈا کرنے والوں سے نمٹنے کے لیے قوم اپنا کردار ادا کرے، سیاچن سے پاک آرمی کے جوانوں کا پیغام
تقریب کے اختتام پر نمایاں کارکردگی دکھانے والے ریکروٹس میں خصوصی انعامات بھی تقسیم کیے گئے۔
