دنیا بھر کے سابق بین الاقوامی کرکٹ کپتانوں نے پاکستان کے سابق کپتان اور سابق وزیرِ اعظم عمران خان کی قید اور صحت سے متعلق خبروں پر گہری تشویش کا اظہار کرتے ہوئے حکومتِ پاکستان سے فوری توجہ دینے کی اپیل کی ہے۔
مشترکہ بیان میں کہا گیا ہے کہ عمران خان کی کرکٹ کے لیے خدمات کو عالمی سطح پر قدر کی نگاہ سے دیکھا جاتا ہے۔ بطور کپتان انہوں نے پاکستان کو 1992 کے کرکٹ ورلڈ کپ میں تاریخی فتح دلائی، جو مہارت، استقامت، قیادت اور کھیل کے اعلیٰ جذبے کی روشن مثال تھی اور جس نے سرحدوں سے بالاتر ہو کر نسلوں کو متاثر کیا۔
یہ بھی پڑھیے: مشکلیں برداشت نہیں کرسکتے تھے تو کرکٹ کلب بنا لیتے، صدر زرداری کا عمران خان پر طنز
بیان میں کہا گیا کہ دستخط کرنے والے سابق کپتانوں میں سے کئی نے عمران خان کے خلاف میدان میں مقابلہ کیا، ان کے ساتھ کرکٹ کھیلی یا ان کی ہمہ جہت صلاحیتوں، کرشماتی قیادت اور مسابقتی جذبے کو اپنا آئیڈیل بنایا۔ سابق کپتانوں نے اس بات کا بھی ذکر کیا کہ سیاسی اختلافِ رائے سے قطع نظر عمران خان جمہوری طور پر منتخب ہو کر اپنے ملک کے اعلیٰ ترین منصب پر فائز ہوئے۔
بیان میں عمران خان کی صحت سے متعلق حالیہ رپورٹس، خصوصاً دورانِ حراست ان کی بینائی میں مبینہ طور پر تشویشناک کمی، اور گزشتہ ڈھائی برس کے دوران قید کے حالات پر شدید تشویش کا اظہار کیا گیا ہے۔ سابق کپتانوں کا کہنا ہے کہ کرکٹ ہمیں منصفانہ کھیل، عزت اور احترام کی وہ اقدار سکھاتی ہے جو میدان کی حد بندی سے کہیں آگے تک جاتی ہیں، اور عمران خان جیسے عالمی اسپورٹس آئیکون اور سابق قومی رہنما کے ساتھ باوقار اور انسانی سلوک کیا جانا چاہیے۔
یہ بھی پڑھیے: سینٹ میں اپوزیشن لیڈر علامہ ناصر عباس کی عمران خان سے آج ملاقات کا امکان، قیادت اڈیالہ جیل روانہ
انہوں نے حکومتِ پاکستان سے مطالبہ کیا کہ عمران خان کو فوری، مناسب اور مسلسل طبی سہولتیں فراہم کی جائیں اور انہیں اپنی پسند کے ماہر ڈاکٹروں سے علاج کی اجازت دی جائے۔ ساتھ ہی انہیں بین الاقوامی معیار کے مطابق انسانی اور باعزت حراستی حالات مہیا کیے جائیں، جن میں قریبی اہلِ خانہ سے باقاعدہ ملاقات کی سہولت بھی شامل ہو۔ بیان میں اس امر پر بھی زور دیا گیا کہ انہیں قانونی کارروائیوں تک منصفانہ اور شفاف رسائی دی جائے اور کسی غیر ضروری تاخیر یا رکاوٹ کے بغیر انصاف کے تقاضے پورے کیے جائیں۔
سابق کپتانوں کا کہنا تھا کہ کرکٹ ہمیشہ قوموں کے درمیان ایک پل کا کردار ادا کرتی رہی ہے۔ میدان میں مقابلہ ختم ہونے کے بعد احترام باقی رہتا ہے اور عمران خان نے اپنے کیریئر میں اسی جذبے کی نمائندگی کی۔ یہ اپیل کھیل کے جذبے اور مشترکہ انسانیت کے تحت کی گئی ہے اور اس کا مقصد کسی بھی قانونی کارروائی پر اثر انداز ہونا نہیں ہے۔
اس اپیل کی توثیق کرنے والوں میں مائیکل ایتھرٹن، ایلن بارڈر، مائیکل بریئرلی، گریگ چیپل، ایان چیپل، بیلنڈا کلارک، سنیل گواسکر، ڈیوڈ گوور، کم ہیوز، ناصر حسین، کلائیو لائیڈ، کپل دیو، اسٹیفن واہ اور جان رائٹ شامل ہیں۔
