سابق وزیر اعظم آزاد کشمیر سردار تنویر الیاس کا مسلم لیگ (ق) میں شامل ہونے کا امکان

سابق وزیر اعظم آزاد کشمیر سردار تنویر الیاس کا مسلم لیگ (ق) میں شامل ہونے کا امکان ہے۔

سابق وزیر اعظم آزاد کشمیر سردار تنویر الیاس سے منگل کے روز اسلام آباد میں چیف آرگنائزر پاکستان مسلم لیگ (ق) چوہدری سرور نے تفصیلی ملاقات کی۔ چوہدری سرور نے سردار تنویر الیاس کو مسلم لیگ (ق) میں شمولیت کی دعوت دی۔ سردار تنویر الیاس نے چوہدری سرور کی نیک نیتی کو سراہا۔

 سردار تنویر الیاس نے آج اپنے ایک بیان میں کہا ہے کہ وہ سابق وزیر اعظم چوہدری شجاعت حسین سے ملاقات کریں گے، فی الحال دیکھ رہے ہیں کہ اکٹھے چل کر کیسے قوم کے لیے بہتری لاسکتے ہیں۔ ان کا کہنا ہے کہ سیاسی عدم استحکام سے معیشت تباہ ہو گئی ہے۔

اطلاعات کے مطابق چیف آرگنائزر مسلم لیگ (ق) چوہدری سرور سردار تنویر الیاس کو لے کر لاہور کے لیے روانہ ہو گئے ہیں۔ سردار تنویر الیاس چوہدری سرور کے ہمراہ سابق وزیر اعظم چوہدری شجاعت حسین سے ملاقات کریں گے ۔

امکان ہے کہ سردار تنویر الیاس مسلم لیگ (ق) میں شامل ہو جائیں گے۔

واضح رہے کہ سابق وزیر اعظم آزاد کشمیر سردار تنویر الیاس کو 11 اپریل 2023 کو آزاد کمشیر کی ہائیکورٹ نے نااہل قرار دیا تھا جس کے بعد انہوں نے کئی مواقع پر کہا کہ تحریک انصاف کے لوگوں نے ہی ان کے خلاف لابنگ کی۔

مختلف ٹی وی چینلز کو انٹرویوز میں سردار تنویر الیاس نے چیئرمین تحریک انصاف کے خلاف کھل کر بیانات دیے۔ وہ عمران خان کے فوج مخالف بیانیے سے بھی نالاں نظر آئے۔

ایک موقع پر انہوں نے کہا تھا کہ عمران خان نے اسد عمر اور پرویز خٹک کو وائسرائے بنا کر آزاد کشمیر بھیجا جس کے بعد پارٹی کے اندر ان کے خلاف لابنگ شروع ہو گئی اور انہیں عہدے سے ہٹا دیا گیا۔