بھارتی رہاست بہار کے بکسار ضلع میں ایک شادی کے دوران دلہن پر فائرنگ کا واقعہ پیش آیا، جس نے حاضرین کو خوفزدہ کر دیا۔ 18 سالہ عارتی کمار شادی کے اسٹیج پر کھڑی تھی جب اس کے پڑوسی دینبندھو نے مبینہ طور پر گولی چلائی۔ دلہن کو گولی پیٹ میں لگی اور فوری طور پر اہل خانہ اور مقامی لوگوں نے اسے صدر اسپتال بکسار منتقل کیا، جہاں حالت سنگین ہونے پر ڈاکٹروں نے اسے وارانسی کے اسپتال کے لیے ریفر کر دیا۔
یہ بھی پڑھیں:’وہ کسی اور کا ہوگا تو قیامت ہوگی‘: نئی نویلی دلہن کو سابق عاشق نے اغوا کرلیا
ابتدائی تحقیقات سے ظاہر ہوتا ہے کہ یہ حملہ ایک ’یک طرفہ محبت‘ کے تنازع سے متعلق تھا۔ دلہن کے اہل خانہ کا کہنا ہے کہ ملزم پہلے بھی اس کی شادی پر اعتراض کر چکا تھا۔ فائرنگ کے بعد ملزم فرار ہو گیا اور پولیس نے اس کی گرفتاری کے لیے چھاپے مارنے شروع کر دیے ہیں۔
واقعہ اس وقت پیش آیا جب شادی کی رسومات جاری تھیں اور دلہن اور دولہا کے درمیان رسم ادا کی جا رہی تھی۔ گولی چلنے کے بعد ہجوم میں ہلچل مچ گئی، کچھ افراد دلہن کو ہوش میں رکھنے کی کوشش کر رہے تھے جبکہ دیگر بھاگ گئے۔ یہ واقعہ بکسار کے چاؤسا پولیس اسٹیشن کے حدود میں منگل کی شب پیش آیا۔
