پاکستان تحریک انصاف کے وائس چیئرمین مخدوم شاہ محمود قریشی سے اڈیالہ جیل میں ان کی صاحبزادی گوہر بانو قریشی کی وکیل بیرسٹر تیمور ملک کے ہمراہ ملاقات ہوئی جس میں پی ٹی آئی رہنما نے کارکنوں کے لیے انہیں ایک اہم پیغام دیا۔
ملاقات کے فوراً بعد شاہ محمود قریشی کی صاحبزادی نے ایک ویڈیو شیئر کی جس میں ان کا کہنا ہے کہ ان کی اپنے وکیل کے ہمراہ والد سے مشاورت ہوئی اور جمعہ کو ایم پی او کے اخراج کے لیے لاہور ہائی کورٹ کی راولپنڈی بینچ میں سماعت ہے۔
“گوہر بانو نے بتایا کہ اس مختصر ملاقات کے دوران شاہ محمود قریشی نے انہیں عوام کو پہنچانے کے لیے ایک واضح پیغام دیا ہے۔
انہوں نے مزید بتایا کہ شاہ محمود قریشی کا پیغام ہے کہ ’میں عمران خان کے ساتھ کھڑا تھا، کھڑا ہوں اور کھڑا رہوں گا‘۔
