ملک میں چھٹی ’نیشنل ماس ریسلنگ چیمپئن شپ‘3 جون کو گوجرانوالہ میں شروع ہو گی۔ چیمپئن شپ میں ملک بھر سے 22 ٹیمیں حصہ لیں گی۔
پاکستان ماس ریسلنگ فیڈریشن کے عہدیدار نواب فرقان خان نے بتایا ہے کہ فیڈریشن کے زیر اہتمام چھٹی نیشنل ماس ریسلنگ چیمپئن شپ3 جون بروز ہفتہ سے گوجرانوالہ میں شروع ہو رہی ہے۔
انہوں نے بتایا کہ چیمپئن شپ کی تیاریاں زور و شور سے جاری ہیں۔ چیمپئن شپ میں پاکستان آرمی، پاکستان واپڈا اور پاکستان پولیس سمیت ملک بھر سے 22 ٹیمیں حصہ لے رہی ہیں۔
چیمپئن شپ میں شرکت کرنے والی ٹیموں کی منیجرز کا اجلاس 2 جون کو ہو گا جس میں ٹورنامنٹ کے مقابلوں کے ڈراز کا اعلان اور کھیل کے حوالے سے قوانین کے بارے میں ٹیموں کو آگاہ کیا جائے گا۔
انہوں نے مزید یتایا کہ چیمپئن شپ 4 جون تک جاری رہے گی۔ چیمپئن شپ میں اول آنے والے کو 10ہزار روپے، دوئم کو ساڑھے 7 ہزار روپے اور تیسرے نمبر پر آنے والے کھلاڑیوں کو 5 ہزار روپے کی انعامی رقم دی جائے گی۔