مشرقِ وسطیٰ میں جاری جنگ کے جلد ختم ہونے کے امکان سے متعلق امریکی صدر کے بیان کے بعد پاکستان اسٹاک ایکسچینج میں آج ایک مرتبہ پھر خریداری کا رجحان لوٹ آیا۔
گزشتہ روز کی شدید مندی کے اگلے ہی روز اس پیش رفت کے نتیجے میں کاروبار کے ابتدائی اوقات میں بینچ مارک کے ایس ای 100 انڈیکس میں تقریباً 8 فیصد اضافہ ریکارڈ کیا گیا۔
یہ بھی پڑھیں: اسٹاک ایکسچینج شدید مندی سے دوچار، انڈیکس میں 11,000 پوائنٹس کی کمی
صبح 9 بج کر 22 منٹ پر انڈیکس 155,783.89 پوائنٹس پر پہنچ گیا جو گزشتہ روز کے مقابلے میں 9,303.75 پوائنٹس یا 6.35 فیصد زیادہ تھا۔
انڈیکس میں تیزی کے بعد مارکیٹ میں مارکیٹ ہالٹ نافذ کر دیا گیا اور تمام ایکویٹی پر مبنی مارکیٹس کو عارضی طور پر معطل کر دیا گیا۔
Buying interest surged at the Pakistan Stock Exchange, with the KSE-100 Index gaining over 9,000 points after Trump suggested the Middle East war might soon end, leading to a market halt due to rapid increases. https://t.co/Qpa8dmQbh3
— Investify Pakistan (@investifypk) March 10, 2026
پاکستان اسٹاک ایکسچینج کی جانب سے جاری کردہ نوٹس میں کہا گیا کہ کے ایس ای-30 انڈیکس میں گزشتہ کاروباری دن کے اختتام کے مقابلے میں 5 فیصد اضافہ ہونے کے باعث ضابطوں کے تحت مارکیٹ ہالٹ نافذ کیا گیا ہے۔
بعد ازاں کاروبار صبح 10 بج کر 22 منٹ پر دوبارہ شروع ہوا تاہم مارکیٹ میں تیزی کا رجحان برقرار رہا، تقریباً 10 بج کر 40 منٹ پر کے ایس ای 100 انڈیکس 157,808.67 پوائنٹس پر پہنچ گیا جو 11,328.53 پوائنٹس یعنی 7.73 فیصد اضافے کو ظاہر کرتا ہے۔
مزید پڑھیں: اسٹاک ایکسچینج میں غیر مستحکم ٹریڈنگ، انڈیکس 1,900 پوائنٹس گر گیا
کاروبار کے دوران آٹو موبائل اسمبلرز، سیمنٹ، کمرشل بینکس، تیل و گیس کی تلاش کرنے والی کمپنیوں، آئل مارکیٹنگ کمپنیوں اور بجلی پیدا کرنے والے شعبوں میں خریداری کا رجحان نمایاں رہا۔
انڈیکس پر اثرانداز ہونے والے بڑے شیئرز میں اٹک ریفائنری لمیٹڈ، حبکو، ماری انرجیز، او جی ڈی سی، پاکستان آئل فیلڈز لمیٹڈ، پاکستان پیٹرولیم لمیٹڈ، حبیب بینک، نیشنل بینک اور یونائیٹڈ بینک مثبت زون میں ٹریڈ کرتے رہے۔
یاد رہے کہ گزشتہ روز یعنی پیر کو پاکستان کی اسٹاک مارکیٹ نے حالیہ تاریخ کے انتہائی ڈرامائی سیشنز میں سے ایک دیکھا تھا جب مشرقِ وسطیٰ میں بڑھتی کشیدگی اور عالمی تیل مارکیٹ میں شدید اتار چڑھاؤ کے باعث سرمایہ کاروں کی بڑے پیمانے پر فروخت سے متعدد شعبوں میں شدید مندی آئی۔
اس روز کے ایس ای 100 انڈیکس 11,015.95 پوائنٹس یعنی 6.99 فیصد کمی کے بعد 146,480.15 پوائنٹس پر بند ہوا تھا۔
مزید پڑھیں: پاکستان اسٹاک مارکیٹ شدید مندی کے باعث عارضی طور پر کیوں معطل کی گئی؟
عالمی سطح پر بھی منگل کو ایشیائی اسٹاک مارکیٹس میں تیزی دیکھی گئی جبکہ تیل کی قیمتوں میں نمایاں کمی ہوئی۔ ایشیا پیسیفک خطے کے حصص کا وسیع انڈیکس 2.6 فیصد بڑھ گیا جبکہ برینٹ خام تیل کی قیمت میں تقریباً 10 فیصد کمی آکر فی بیرل 90 ڈالر سے نیچے آگئی۔
جاپان کے نکی 225 انڈیکس میں 3.6 فیصد جبکہ جنوبی کوریا کے کوسپی انڈیکس میں 6.4 فیصد اضافہ ریکارڈ کیا گیا۔ تاہم خطے میں کشیدگی برقرار ہے اور ایران کی فوج نے میزائل حملوں میں مزید شدت لانے کا عندیہ بھی دیا ہے۔
