کینیڈا کے شہر ٹورنٹو میں امریکی قونصل خانے کے باہر فائرنگ کا واقعہ پیش آیا ہے، جسے حکام دہشتگردی کے زاویے سے دیکھ رہے ہیں۔
غیر ملکی میڈیا کے مطابق یہ حملہ ٹورنٹو کے ڈاؤن ٹاؤن علاقے میں صبح کے وقت ہوا۔
پولیس کی تحقیقات اور شواہد
پولیس کو اطلاع ملنے پر فوراً اہلکار موقع پر پہنچے، جہاں عمارت کے باہر گولیوں کے خول اور فائرنگ کے واضح شواہد ملے۔
ابتدائی تفتیش میں یہ بات سامنے آئی کہ 2 نامعلوم افراد ایک سفید گاڑی میں آئے، گاڑی سے نکل کر قونصل خانے کی عمارت پر فائرنگ کی اور پھر فرار ہو گئے۔
فائرنگ کے نتیجے میں قونصل خانے کے دروازے اور شیشے کو جزوی نقصان پہنچا، تاہم کسی کے زخمی ہونے کی اطلاع موصول نہیں ہوئی۔
تحقیقات اور عوامی اپیل
کینیڈین پولیس اور رائل کینیڈین ماؤنٹڈ پولیس اس واقعے کو قومی سلامتی کے نقطہ نظر سے دیکھتے ہوئے مشترکہ تحقیقات کر رہی ہیں۔
تفتیشی حکام نے مشتبہ گاڑی کی تصویر جاری کی ہے اور عوام سے معلومات فراہم کرنے کی اپیل کی ہے۔
سیکیورٹی میں اضافہ
واقعے کے بعد ٹورنٹو اور اوٹاوا میں امریکی اور اسرائیلی سفارتی عمارتوں کے اطراف سیکیورٹی مزید سخت کر دی گئی ہے تاکہ کسی ممکنہ خطرے سے نمٹا جا سکے۔
