چیئرمین پاکستان کرکٹ بورڈ (پی سی بی) محسن نقوی نے قومی ہاکی ٹیم کے بے روزگار کھلاڑیوں کو ملازمتیں فراہم کرنے کا اعلان کیا ہے جبکہ زخمی کھلاڑیوں کا علاج بھی پی سی بی کے زیر اہتمام کیا جائے گا۔
یہ اعلان چیئرمین پی سی بی نے قومی ہاکی ٹیم کے کپتان عماد بٹ کی قیادت میں کھلاڑیوں سے قذافی اسٹیڈیم لاہور میں ملاقات کے دوران کیا۔
چیئرمین پی سی بی محسن نقوی نے کھلاڑیوں کو 8 سال بعد ورلڈ کپ کے لیے کوالیفائی کرنے پر مبارکباد بھی دی۔
انہوں نے کہاکہ پی سی بی ہمیشہ کی طرح ہاکی کھلاڑیوں کے ساتھ تعاون جاری رکھے گا اور زخمی کھلاڑیوں کا علاج بھی مکمل طور پر یقینی بنایا جائے گا۔ انہوں نے پاکستانی ہاکی ٹیم کے لیے نیک خواہشات کا بھی اظہار کیا۔
ملاقات کے بعد ہیڈ کوچ خواجہ جنید اور کپتان عماد بٹ نے میڈیا سے گفتگو میں چیئرمین پی سی بی محسن نقوی کی بھرپور سپورٹ پر شکریہ ادا کیا اور کہا کہ ان کی حمایت نے کھلاڑیوں کی حوصلہ افزائی میں اہم کردار ادا کیا ہے۔
