ملائیشیا میں روکا گیا پی آئی اے کا طیارہ وطن واپس روانہ

ملائیشیا کی عدالت نے کوالالمپور میں پی آئی اے کا طیارہ روکنے والے حکم کو معطل کر دیا، روکے گئے قومی ایئر لائن پی آئی اے کے طیارے کو وطن واپسی کی اجازت دے دی گئی۔

ترجمان پی آئی اے کے مطابق طیارہ اسلام آباد کے لیے روانہ ہو گیا ہے اور رات ساڑھے 10 بجے اسلام آباد پہنچے گا۔

اجازتی حکمنامہ ملتے ہی پی آئی اے کا طیارہ کوالمپور سے پرواز پی کے 6893 کے ذریعے اسلام آباد کے لیے روانہ ہو گیا، پی آئی اے کی لیگل ٹیم نے 3 دن میں عدالتی حکم کو معطل کروا کے طیارہ واگزار کروایا۔

پی آئی اے حکام کے مطابق 26 مئی کو ملائیشیا کی مقامی عدالت نے بغیر پی آئی اے کو طلب یا نوٹس کیے طیارہ روکنے کے احکامات جاری کیے تھے۔

طیارہ روکنے کے احکامات 29 مئی کو طیارے کی روانگی سے چند منٹ قبل پی آئی اے اور ایئر پورٹ حکام کو وصول کروائے گئے۔

اس سے قبل پی آئی اے کے ترجمان نے تصدیق کرتے ہوئے کہا تھا کہ مقامی عدالت نے جمعے کو طیارہ روکنے کے حکم کو پی آئی اے کے حق میں ختم کر دیا تھا۔

حکام کے مطابق پی آئی اے کا طیارہ پرواز پی کے 6893 مسافروں کے بغیر پاکستان واپس آئے گا، بھارتی فضائی حدود میں داخلے کی اجازت نہ ملنے کی وجہ سے طیارہ ملائیشیا میں رکا رہا۔