بھارتی نجی ائیرلائن کے ایک مسافر طیارے کا دوران پرواز انجن فیل ہو گیا جس کے باعث پائلٹ کو ہنگامی لینڈنگ کرنا پڑی۔
بھارتی میڈیا رپورٹس کے مطابق پرواز کے دوران طیارے میں اچانک فنی خرابی پیدا ہوئی اور انجن نے کام کرنا بند کر دیا، جس کے بعد پائلٹ نے صورتحال کو مدنظر رکھتے ہوئے فوری طور پر دلی کے اندرا گاندھی انٹرنیشنل ائیرپورٹ پر ہنگامی لینڈنگ کی۔ حکام کے مطابق طیارے میں سوار تمام مسافر محفوظ رہے اور لینڈنگ کے بعد انہیں بحفاظت باہر منتقل کر دیا گیا۔
یہ بھی پڑھیں: 150مسافروں کو لے جانے والے بھارتی طیارے میں فنی خرابی، ہنگامی لینڈنغ
رپورٹس کے مطابق انجن فیل ہونے پر ائیرپورٹ پر فل ایمرجنسی نافذ کر دی گئی تھی جبکہ طیارہ محفوظ انداز میں رن وے پر اتار لیا گیا۔
یہ واقعہ ایسے وقت پیش آیا ہے جب حالیہ دنوں میں بھارتی ائیرلائنز کو متعدد فنی خرابیوں کے واقعات کا سامنا رہا ہے۔ چند روز قبل ایئر انڈیا کی لندن جانے والی پرواز بھی تکنیکی خرابی کے باعث تقریباً 7 گھنٹے فضا میں رہنے کے بعد واپس دلی لینڈ کرنے پر مجبور ہو گئی تھی۔
یہ بھی پڑھیں: بنگلہ دیش: ایئر فورس کے تربیتی طیارے کی جیشور میں ہنگامی لینڈنگ
اسی طرح گزشتہ ہفتوں میں بھی مختلف بھارتی پروازوں کو تکنیکی مسائل کے باعث احتیاطی طور پر واپس لینڈ کرایا گیا، جس کے بعد مسافروں کی حفاظت کے پیش نظر طیاروں کی تکنیکی جانچ کی گئی۔
ماہرین کے مطابق حالیہ واقعات کے بعد بھارتی فضائی کمپنیوں کی تکنیکی نگرانی اور طیاروں کی مینٹیننس کے نظام پر سوالات اٹھائے جا رہے ہیں، تاہم حکام کا کہنا ہے کہ ہر واقعے میں حفاظتی پروٹوکول کے مطابق فوری کارروائی کی گئی اور کسی قسم کا جانی نقصان نہیں ہوا۔
