بلوچستان عوامی پارٹی (بی اے پی) کے بانی رہنما سینیٹر سید احمد ہاشمی کے صاحبزادے سید حسین ہاشمی نے پارٹی کو خیر باد کہہ دیا ہے۔
حسین ہاشمی نے ’بی اے پی‘ چھوڑنے کے بعد پیپلزپارٹی میں شمولیت اختیار کر لی اور اس کا باضابطہ اعلان پیپلز پارٹی کے صوبائی صدر جنگیز جمالی اورجنرل سیکرٹری روزی خان کاکڑ کی موجودگی میں کیا۔
اس موقع پر صوبائی صدر پیپلزپارٹی جنگیز جمالی نے کہا کہ حسین ہاشمی ایک سینیئر سیاست دان اور ان کے ساتھ پرانا تعلق ہے۔ پیپلز پارٹی میں شمولیت پر ان کو خوش آمدید کہتے ہیں۔
انہوں نے کہا کہ بلوچستان کے لیے آج ایک اہم دن ہے کیوں کہ ایک بڑے گھرانے سے تعلق رکھنے والے نوجوان نے پیپلز پارٹی میں شمولیت اختیار کی ہے۔
حسین ہاشمی کا اس موقع پر کہنا تھا کہ میں نے ’بی اے پی سے‘ سے مستعفی ہو کر پیپلزپارٹی میں شمولیت اختیار کر لی ہے۔ آصف علی زرداری، بلاول بھٹوزرداری سمیت صوبائی قیادت کے ساتھ مل کر عوام کی خدمت جاری رکھوں گا۔
