لاہور جنرل اسپتال کے ڈاکٹروں نے بروقت اور کامیاب طبی کارروائی کرتے ہوئے 3 ماہ کے بچے کے معدے سے لوہے کا واشر نکال کر اس کی جان بچا لی۔
اسپتال انتظامیہ کے مطابق معصوم بچے کے معدے میں موجود لوہے کا واشر انڈوسکوپی کے ذریعے نکالا گیا۔ پیچیدہ نوعیت کا یہ پروسیجر اسسٹنٹ پروفیسر حوریہ رحمان نے پروفیسر محمد شاہد کی نگرانی میں کامیابی سے مکمل کیا۔
ڈاکٹروں کے مطابق علی زین نامی 3 ماہ کا بچہ گزشتہ 10 دن سے بخار اور کھانسی میں مبتلا تھا۔ طبی معائنے اور ایکسرے رپورٹ کے بعد انکشاف ہوا کہ بچے کے معدے میں غیر ملکی جسم موجود ہے، جس پر فوری طور پر طبی ٹیم نے کارروائی کا فیصلہ کیا۔
کامیاب پروسیجر پر پرنسپل پروفیسر فاروق افضل اور ایم ایس پروفیسر ڈاکٹر فریاد حسین نے ڈاکٹروں کی ٹیم کو مبارک باد دی، جبکہ بچے کی جان بچنے پر والدین نے طبی عملے کا شکریہ ادا کرتے ہوئے دعائیں دیں۔
