اقوام متحدہ کے سیکریٹری جنرل انتونیو گوتریس نے اسلام آباد میں امریکا اور ایران کے مابین شروع ہونے والے مذاکرات کو ایک بڑی سفارتی کامیابی قرار دیتے ہوئے اس کا خیر مقدم کیا ہے۔
یو این ترجمان اسٹیفن دوجارک کے مطابق سیکریٹری جنرل اقوام متحدہ نے دونوں ممالک پر زور دیا ہے کہ وہ خلوصِ نیت کے ساتھ ان مذاکرات کو آگے بڑھائیں۔
سیکریٹری جنرل نے ان مذاکرات کو خطے میں امن کی جانب ایک ‘اہم پیش رفت’ قرار دیا ہے۔
انہوں نے فریقین کو مشورہ دیا ہے کہ اس سنہری موقع سے فائدہ اٹھایا جائے اور تعمیری بات چیت کے ذریعے ایک ایسے جامع معاہدے تک پہنچنے کی کوشش کی جائے جو پائیدار ثابت ہو۔
واضح رہے کہ یہ تاریخی مذاکرات پاکستان کی میزبانی اور ثالثی میں اسلام آباد میں منعقد ہو رہے ہیں، جس کا بنیادی مقصد تہران اور واشنگٹن کے درمیان حالیہ شدید کشیدگی کو ختم کرنا اور سفارتی حل تلاش کرنا ہے۔
اس سے قبل وزیراعظم شہباز شریف کی متحرک سفارت کاری کے نتیجے میں دونوں ممالک دو ہفتوں کی عارضی جنگ بندی پر رضامند ہوئے تھے۔
اس معاہدے کے تحت امریکا نے عسکری کارروائیاں روکنے اور ایران نے آبنائے ہرمز کو بین الاقوامی جہاز رانی کے لیے کھولنے کی یقین دہانی کرائی تھی۔
اسی جنگ بندی کو مستقل امن میں بدلنے کے لیے دونوں ممالک کے اعلیٰ سطحی وفود اب اسلام آباد میں موجود ہیں، جہاں پاکستان کی وساطت سے مذاکرات کا عمل شروع کیا جا رہا ہے۔
