وزیر اعظم کے معاون خصوصی برائے احتساب عرفان قادر نے کہا کہ احتساب سب کا ہونا چاہیے کوئی بھی اس ملک میں مقدس گائے نہیں ہے، ججز کے خلاف بھی نیب ریفرنس بھیجا جا سکتا ہے۔
معاون خصوصی برائے احتساب عرفان قادر نے اسلام آباد میں پریس کانفرنس کرتے ہوئے کہا کہ کرپشن کسی بھی معاشرے کے لیے قابل قبول نہیں ہے، جب تک احتساب نہیں ہوگا کرپشن ختم نہیں کی جا سکتی، ججز کی آڈیو لیکس سے کرپشن کا عنصر سامنے آیا ہے۔
’ججز آڈیو لیکس پر حکومت نے کمیشن بنایا ہے، ججز کو سپریم جوڈیشل کونسل میں جاکر اپنا موقف پیش کرنا ہوگا۔
معاون خصوصی عرفان قادر نے کہا کہ قومی احتساب آرڈیننس سب کے لیے ہے، ایس ممکن نہیں ہے کہ ایک کو سزا دی جائے اور دوسرے سے پوچھ گچھ بھی نہ کی جائے۔
مزید پڑھیں
’ہر وہ فعل جس سے کسی کو ناجائز فائدہ ہو اسے کرپشن ہی کہتے ہیں۔‘
عرفان قادر نے مزید کہا کہ القادرٹرسٹ کیس میں مزید کچھ شواہد سامنے آئے ہیں، کچھ نئی فنڈنگز اور نئے شواہد ملے ہیں، ساڑھے 4 ارب روپے کی ٹرانزکشن سامنے آئی ہیں جو فرحت شہزادی اور اسکے شوہر کے اکاؤنٹس میں منتقل کی گئی تھیں۔
انہوں نے مزید کہا کہ جو 190 پاؤنڈ آئے تھے وہ بھی پاکستان کے نام آئے تھے لیکن گئے کسی اور کے اکاؤنٹ میں ہیں، اس رقم پر ٹیکس بھی نہیں لیا گیا تھا۔
انکا کہنا تھا کہ ہم لیگل پروسیجر کے ذریعے فرحت شہزادی کو پاکستان لانے کی کوشش کر رہے ہیں۔
