پی این ایس شاہجہاں 10 مئی 2023 کو چین کے شہر شنگھائی میں منعقدہ ایک تقریب میں کمیشن کیا گیا تھا۔ تقریب میں چیف آف دی نیول اسٹاف ایڈمرل محمد امجد خان نیازی مہمان خصوصی تھے۔
پاکستان کے سفر پر روانہ ہونے کے بعد پی این ایس شاہجہاں پہلے ملائیشیا پہنچا جہاں اس نے لنگکاوی انٹرنیشنل میری ٹائم اینڈ ایرو اسپیس نمائش میں شرکت کی۔ اس نمائش میں 30 دیگر ممالک نے بھی اپنے جہاز شرکت کے لیے بھیجے تھے۔
ملائیشیا میں مختلف معززین، مندوبین اور مقامی لوگوں نے پی این ایس شاہجہاں کا دورہ کیا۔ بعد ازاں پی این ایس شاہجہاں کولمبو سری لنکا پہنچا جس کا مقصد پاکستان اور سری لنکا کے دوطرفہ تعلقات کو مضبوط بنانا، باہمی تعاون کو بڑھانا اور دونوں بحری افواج کے درمیان تعاون کے نئے مواقع تلاش کرنا تھا۔
کولمبو پہنچنے پر پاک بحریہ کے جہاز کا سری لنکن نیوی کے حکام نے پی این ایس شاہجہاں کا پرتپاک استقبال کیا۔ کولمبو میں سری لنکا کے وزیر ماحولیات، سری لنکن بحریہ کے سربراہ اور مقامی کمیونٹی کے نامور افراد نے جہاز کا دورہ کیا۔
اس موقع پر سری لنکا بحریہ کے حکام سے ملاقاتوں کے دوران کمانڈنگ آفیسر نے باہمی دلچسپی کے امور پر تبادلہ خیال کیا اور چیف آف دی نیول سٹاف کی طرف سے سری لنکا کے عوام اور بالخصوص میزبان بحریہ کے لیے نیک خواہشات کا اظہار کیا۔
آخر میں پی این ایس شاہجہاں اور ایس ایل این ایس پراکرامباہو کے درمیان مشترکہ بحری مشق بھی ہوئی۔
پاکستانی سمندری حدود میں پہنچنے پر کمانڈر پاکستان فلیٹ ریئر ایڈمرل محمد فیصل عباسی جہاز پر سوار ہوئے اورا نہوں نے جہاز کے کامیاب ٹرائل اور کمیشننگ پر عملے کو مبارکباد دی۔
کراچی پہنچنے پر پی این ڈاکیارڈ کراچی میں ایک استقبالیہ تقریب کا بھی انعقاد کیا گیا جس میں عملے، افسران اور ملاحوں کے اہل خانہ نے شرکت کی۔
