اسلام آباد ضلعی انتظامیہ کے ٹوئٹر اکاؤنٹ پر گزشتہ شب ایک ویڈیو کلپ کے ساتھ اطلاع دی گئی کہ’ I-10 مرکز میں فٹ پاتھوں پر تجاوزات کے حوالے سے متعدد عوامی شکایات پر سی ڈی اے انفورسمنٹ کی جانب سے ڈی جی انفورسمنٹ کے زیر نگرانی رات گئے بڑے پیمانے پر تجاوزات کیخلاف آپریشن کیا گیا‘ ۔
تجاوزات کے خلاف آپریشن کی ویڈیوز اور تصاویر وائرل ہوئیں تو دن چڑھے چئیرمین پی ٹی آئی عمران خان نے بھی ٹویٹ کر دی اور لکھا ’بڑھتی ہوئی مہنگائی اور بیروزگاری کے دوران امپورٹڈ سرکار نے اسلام آباد کےI-10 سیکٹر میں ہماری حکومت کی جانب سے”احساس ریڑھی بان“پروگرام کےتحت فراہم کی گئی ریڑھیاں/سٹالز تباہ کرکے نہایت بےحسی کامظاہرہ کیا ہے۔کمزوروں اور غریبوں کو جان بوجھ کر نشانہ بنانا غیرانسانی اور قابلِ مذمت عمل ہے‘
عمران خان کے ٹویٹ کو پونے چار لاکھ سے زائد صارفین نے دیکھا، سولہ ہزار ری ٹویٹس جبکہ ہزار کے قریب کمنٹس کیے گئے ۔سوشل ٹائم لائنز پر معاملہ زیر بحث آیا تو I-10کے ہیش ٹیگ کے ساتھ ٹوئٹر پر ٹرینڈ بھی چلایا گیا ۔
سردار طیب خان نامی صارف نے عمران خان کے ٹویٹ پر اپنے کمنٹس میں لکھا کہ’ انٹرنیشنل ہیومن رائٹس موومنٹ اس عمل کی شدید مذمت کرتی ہے۔ لوگوں کو جو کچھ مل رہا ہے اسے ختم کرنے کا مقصد کیا ہے؟ غریبوں کو روز بروز مشکلات میں ڈالنے کے اس عمل کو ہر فورم پر اجاگر کیا جائے گا‘
سید احسان نامی صارف نے لکھا ’ ظالم ظلم ہی کرتا ہے پی ڈی ایم اور ہینڈلر دنیا کے ظالم ترین لوگ ہیں اپنے لوگوں اور اپنے ملک سے وفادار نہیں‘
سوشل میڈیا پر شور شرابے میں اسلام آباد انتظامیہ کو بھی اپنا مؤقف دینا پڑا ، اپنے ٹویٹس میں عمران خان کا نام لیے بغیر کہا گیا کہ ’یہ جھوٹ پر مبنی اور حقائق کے منافی اطلاع ہے،سی ڈی اے اور ضلعی انتظامیہ نے صرف تجاوزات کے خلاف کارروائی کی ہے، وہ ٹھیلے اور ریڑھیاں ہٹائی گئیں جو فٹ پاتھ یا گرین بیلٹ پر موجود تھیں، جن کی وجہ سے ٹریفک کی روانی متاثر ہورہی تھی‘
ترجمان آئی سی ٹی ڈاکٹر محمد عبداللّٰه تبسم کے مطابق ’مخصوص اور من گھڑت بیان جو ضلعی انتظامیہ اور سی ڈی اے کی روزانہ کی بنیاد پر جاری تجاوزات اور قبضہ مافیا کے خلاف کارروائی جاری ہے یہ اس کے خلاف پروپیگنڈہ ہے مذکورہ خبر میں کسی قسم کی کوئی صداقت نہ ہے‘
ضلعی انتظامیہ نے یہ بھی واضح کیا کہ ’مذکورہ خبر میں من گھڑت الزام کہ درجنوں ریڑھیاں تباہ، سرکاری عملہ فروخت کے لیے رکھا سامان بھی لے اڑا، جھوٹ پر مبنی اور حقائق کے منافی ہے‘
ٹویٹ میں مزید کہا گیا ’سی ڈی اے اور ضلعی انتظامیہ اسلام آباد تجاوزات اور قبضہ مافیا کے خلاف بغیر کسی دباؤ کے آپریشن جاری رکھے گی‘
ضلعی انتظامیہ کی ٹویٹس پر بھی صارفین نے رد عمل دیا، گل زیب کیانی نامی صارف نے لکھا’ اگر عام شہری آپکو ایسی جگہ کی نشاندھی کریں اسلام آباد میں جہاں پر طاقتور ہوٹل مالکان نے فٹ پاتھ پر قبضہ کر رکھا ہے اور عام شہریوں کو وہاں سے گزرنے کی اجازت نہی تو کیا آپ اس کے خلاف بلا امتیاز کارروائی کریں گے؟‘
اویس یعقوب نے لکھا’ اچھا کام کیا ہے، ہم اسلام آباد کے رہائشی ہونے کے ناتے اس کو پوری طرح سمجھتے ہیں، براہ کرم اس مہم کو نہ روکیں۔
