طارق ملک کے مستعفی ہونے کے 2 دن بعد اسد رحمٰن گیلانی نے نیشنل ڈیٹا بیس اینڈ رجسٹریشن اتھارٹی (نادرا) کے نئے چیئرمین کے طور پر اضافی چارج سنبھال لیا ہے۔
نادرا نے ایک ٹوئیٹ میں تصدیق کی کہ اسد رحمٰن گیلانی، جو پاکستان سول سروس کے گریڈ 22 کے افسر ہیں اور بورڈ آف انویسٹمنٹ کے سیکریٹری بھی ہیں، اسلام آباد میں نادرا ہیڈکوارٹرز میں چیئرمین کے عہدے کا چارج سنبھال لیا ہے۔ اسد رحمٰن گیلانی نے نادرا ہیڈکوارٹرز میں پہلے دن اپنے فرائض منصبی بھی انجام دیے۔
چیئرمین نے تمام ملازمین کو ہدایت کی کہ وہ اپنی معمول کی سرگرمیاں بھر پور طریقے سے جاری رکھیں اور عوام کو نادرا کی خدمات اور سہولیات کی بلا تعطل فراہمی یقینی بنائیں۔ انہوں نے کہا کہ شہریوں کو نادرا کی خدمات کی فراہمی میں بہتری کا سلسلہ جاری رہے گا اور اس سلسلے میں وہ علاقائی دفاتر کی سرگرمیوں کا ذاتی طور پر جائزہ لینے کے لیے بہت جلد نادرا ریجنل ہیڈ آفسز کے دورے کریں گے۔
اسد رحمٰن گیلانی نے نادرا کے تمام شعبوں کے سربراہان کو ہدایت کی کہ شناختی کارڈ کی پرنٹنگ کے سلسلے میں تاخیر کو جلد از جلد ختم کرنے کے لیے ہفتہ اور اتوار کے دن بھی دفتری سرگرمیاں جاری رکھی جائیں۔
اسد رحمان گیلانی نے چیئرمین نادرا کے عہدے کا چارج سنبھال لیا اور نادرا ہیڈکوارٹرز میں پہلے دن اپنے فرائض منصبی انجام دئیے۔
چیئرمین نادرا نے تمام ملازمین کو ہدایت کی کہ وہ اپنی معمول کی سرگرمیاں بھرپور طریقے سے جاری رکھیں اور عوام کو نادرا خدمات اور سہولیات کی بلاتعطل فراہمی… pic.twitter.com/vDKldyjmLl
— NADRA (@NadraPak) June 16, 2023
یاد رہے کہ اسد رحمٰن گیلانی کا تقرر 14 جون کو طارق ملک کے اچانک استعفے کے بعد ہوا ہے، انہوں نے اپنی 3 سالہ مدت پوری ہونے سے ایک سال قبل عہدے سے استعفیٰ دے دیا تھا۔ طارق ملک نے وزیراعظم شہباز شریف سے ملاقات کے دوران نادرا چیئرمین کے عہدے سے اپنا استعفیٰ پیش کیا تھا۔
ملاقات کے بعد جاری کیے گئے بیان میں طارق ملک نے کہا تھا کہ وہ خود کو اس لحاظ سے خوش قسمت سمجھتے ہیں کہ انہیں کبھی ملازمت کی تلاش نہیں رہی بلکہ اپنے جذبہ تعمیر کے تحت بچوں، نوجوانوں اور پارلیمان کو مضبوط بنانے کے مشن کو آگے بڑھانے کے مواقع ہمیشہ ملتے رہے ہیں۔
مزید پڑھیں
انہوں نے بتایا کہ اقوامِ متحدہ نے حال ہی میں انہیں پاکستان میں ڈیجیٹل انقلاب پر تیار کی جانے والی ’نیشنل ہیومن ڈیولپمنٹ رپورٹ 2023‘ کی ٹیکنیکل ایڈوائزری کمیٹی کا سربراہ مقرر کیا ہے جو نہ صرف ان کے لیے اعزاز ہے بلکہ انہیں اپنے اس مشن کو آگے بڑھانے کا ایک شاندار موقع بھی فراہم کرتا ہے۔ ان کا کہنا تھا کہ ان حقائق کے پیش نظر وہ چیئرمین نادرا کے عہدے سے سبکدوش ہو رہے ہیں تاکہ پوری لگن اور دلجمعی کے ساتھ اپنی تمام ذمہ داریوں کو خوش اسلوبی کے ساتھ انجام دے سکیں اور اپنے مشن کو آگے بڑھا سکیں۔
طارق ملک کو پی ٹی آئی حکومت نے جون 2021 میں دوسری بار نادرا کا چیئرمین مقرر کیا تھا۔
