سپریم کورٹ کے وکیل عبدالرزاق شر کے قتل کیس میں تحقیقات کے لیے تشکیل کردہ جے آئی ٹی نے چیئرمین تحریک انصاف عمران خان کو 26 جون کو ذاتی حیثیت میں بیان ریکارڈ کرانے کے لیے کوئٹہ طلب کر لیا ہے۔
ذرائع کے مطابق جوائنٹ انویسٹی گیشن ٹیم نے اس ضمن میں سابق وزیراعظم عمران خان کو نوٹس بھیج دیا ہے، جو چیئرمین تحریک انصاف کو لاہور پولیس کے ذریعہ وصول کروایا جائے گا۔
نوٹس میں سربراہ تحریک انصاف کو تعزیرات پاکستان کی دفعہ 160 کے تحتجے آئی ٹی کے سامنے پیش ہو کر اپنے دفاع میں بیان ریکارڈ کروانے کا کہا گیا ہے۔
چیئرمین تحریک انصاف عمران خان کیخلاف سپریم کورٹ کے سینیئر وکیل عبدالرزاق شر کے قتل کا مقدمہ درج ہے۔ واضح رہے کہ مقتول وکیل نے بلوچستان ہائیکورٹ سے آئین کے آرٹیکل 6 کے تحت عمران خان کیخلاف سنگین غداری کا مقدمہ درج کرنے کے لیے درخواست دائر کی تھی۔
حکومت نے ڈی آئی جی سی ٹی ڈی کی سربراہی میں عبدالرزاق شر ایڈووکیٹ کے قتل کی تحقیقات کیلئے مشترکہ تحقیقاتی ٹیم تشکیل دی تھی۔
