پی آئی اے نے حج آپریشن کا پہلا مرحلہ مکمل کر لیا، حج پروازوں کی بروقت روانگی کا تناسب 94 فیصد رہا، دوسرا مرحلہ 2 جولائی سے شروع ہو کر 2 اگست کو اختتام پذیر ہو گا۔
گزشتہ شب کراچی تا جدہ آپریٹ ہونے والی پی آئی اے کی پرواز کے ساتھ ہی قبل از حج آپریشن مکمل ہوگیا۔ کل 268 پروازوں کے ذریعے سے 61،467 حجاج کرام حجاز مقدس روانہ ہوئے۔
ان پروازوں کے ذریعے سے تقریبا 41 ہزار سرکاری حجاج کرام، 19 ہزار پرائیوٹ حجاج کرام اور 600 خدام مدینہ منورہ اور جدہ روانہ ہوئے۔
پروازیں کراچی، اسلام آباد، لاہور ملتان، فیصل آباد، سیالکوٹ اور پشاور سے براہ راست روانہ ہوئیں۔ سکھر، رحیم یار خان اور کوئٹہ سے حجاج کرام نے براستہ کراچی سے جدہ کا سفر کیا۔
پی آئی اے کی حج پروازوں کی بروقت روانگی کا تناسب 94 فیصد رہا، 268 پروازوں میں سے 249 پروازیں وقت پر یا وقت سے کچھ دیر پہلے ہی روانہ ہوئیں۔
پورے حج آپریشن میں صرف 19 پروازیں مختلف وجوہات کی بنا پر تاخیر کا شکار ہوئیں ، حج آپریشن میں بروقت روانگی کے اعلیٰ تناسب پر سی ای او پی آئی اے نے متعلقہ ٹیموں کو شاباش دی
پی آئی اے کے قبل از حج آپریشن کا آغاز 21 مئی سے ہوا تھا جو 22 جون تک جاری رہا، پی آئی اے کا بعد از حج آپریشن کا آغاز 2 جولائی سے ہوگا جو 2 اگست تک جاری رہے گا۔
