وزیراعظم پاکستان میاں شہباز شریف کے مشیر اور صدر پاکستان مسلم لیگ ن خیبر پختونخوا انجینئر امیر مقام نے دعویٰ کیا ہے کہ ان کے آبائی علاقے شانگلہ میں ان پر مسلح حملہ کیا گیا جو ناکام ہو گیا۔
انجینئر امیر مقام نے مقامی میڈیا کو بتایا کہ وہ شانگلہ میں نادرا دفتر کے افتتاح اور عوامی جلسے میں شرکت کے لیے جا رہے تھے کہ انہوں نے کچھ مسلح افراد کو دیکھا جو پوزیشن لے کر حملے کے لیے تیار تھے۔
امیر مقام نے بتایا کہ ان کے گارڈز اور سیکیورٹی اسٹاف کی جانب سے بروقت خبردار کرنے سے وہ فرار ہو گئے۔
امیر مقام نے مزید کہا کہ ان پر حملے کی تیاری اس جگہ بھی کی گئی تھی جہاں سال 2014 میں بم حملہ ہوا تھا۔ جس میں وہ بچ گئے تھے۔
شانگلہ پولیس کے مطابق انجینئرامیر مقام پرراستے میں مشکوک افراد نے ہوائی فائرنگ کی تاہم کوئی جانی نقصان نہیں ہوا۔ پولیس کا کہنا ہے کہ واقعے کے بعد پولیس نے مشکوک افراد کی تلاش شروع کر دی ہے۔
دوسری جانب وزیراعظم پاکستان شہباز شریف نے امیر مقام پر حملے کی منصوبہ بندی کی شدید مذمت کی ہے۔
اللہ تعالی کا لاکھ لاکھ شکر ہے کہ اس نے پاکستان مسلم لیگ ن کے رہنما امیر مقام کو قاتلانہ حملے میں محفوظ رکھا۔ پاکستان کے چپے چپے کی حفاظت ہمارے ایمان کا حصہ ہے ۔ اس ملک خداداد کے تحفظ اور روشن مستقبل کے لئے ہماری سیاسی قیادت ، عوام اور قانون نافذ کرنے والے اداروں سمیت سیکورٹی…
— Shehbaz Sharif (@CMShehbaz) June 24, 2023
اپنے ایک بیان میں وزیراعظم شہباز شریف نے کہا کہ اللہ کا لاکھ لاکھ شکر ہے کہ امیر مقام قاتلانہ حملے میں محفوظ رہے۔
