وفاقی وزیر خزانہ سینیٹر محمد اسحاق ڈار کی صدارت میں پاکستان اسٹیئرنگ کمیٹی ( پی ایس سی ) کا اجلاس ہوا جس میں ایئرپورٹ کی آئوٹ سورسنگ کے لیے مستقبل کے روڈ میپ کے بارے میں فیصلے کیے گئے ہیں۔
پیر کو فنانس ڈویژن میں ہوائی اڈوں کے آپریشنز کی آئوٹ سورسنگ کی نگرانی کے لیے ہونے والے پاکستان سٹیئرنگ کمیٹی کے اجلاس میں وفاقی وزیر ہوابازی اور ریلوے خواجہ سعد رفیق، وفاقی وزیر تجارت سید نوید قمر، وزیراعظم کے معاون خصوصی برائے خزانہ طارق باجوہ، وزیراعظم کے معاون خصوصی برائے حکومتی افادیت ڈاکٹر محمد جہانزیب خان، سیکرٹری ایوی ایشن، ڈی جی سی اے اے، آئی ایف سی کے نمائندوں اور سینئر افسران نے شرکت کی۔
اجلاس کے دوران آئی ایف سی، ٹرانزیکشن ایڈوائزر نے کمیٹی کو بریفنگ بھی دی جس میں سروس ڈیلیوری کو بہتر بنانے اور بہترین بین الاقوامی طریقوں اور معیار سے مطابقت رکھنے کے لیے پہلے ایئرپورٹ کی آئوٹ سورسنگ کے لیے مستقبل کے روڈ میپ کے بارے میں فیصلے کیے گئے۔
