سابق صدر جنرل پرویز مشرف کے اہل خانہ انکی میت کے ہمراہ دبئی سے ایک خصوصی طیارے کے ذریعے کراچی پہنچ گئے ہیں۔
دبئی سے میت لے کر آنے والی پرواز ایم ایل ایم 567 میں سابق صدر جنرل پرویز مشرف کی اہلیہ صہبا مشرف اور صاحبزادی عائلہ رضا سمیت دیگر احباب بھی انکی تدفین کیلئے کراچی پہنچے ہیں۔
ڈان نیوز کے مطابق پرویز مشرف کی میت المکتوم انٹرنیشنل ایئرپورٹ دبئی سے خصوصی پرواز MLM-567 کے ذریعہ مقامی وقت کے مطابق شام 7 بجکر 12 منٹ پر روانہ ہوئی تھی۔ جس نے رات 9:51 بجے کراچی کے جناح انٹرنیشنل ائیرپورٹ پر لینڈ کیا۔
طیارے کو کراچی کے اولڈ ٹرمینل کے قریب پارک کرکے میت باہر لائی گئی۔ اہل خانہ کو میت کے ہمراہ سخت سیکیورٹی میں ان کی منزل پر پہنچادیا گیا۔
پرویز مشرف کی نماز جنازہ منگل کو بعد نماز ظہر ملیر کینٹ کی کوئٹہ لائن مسجد میں ادا کی جائے گی۔
پرویز مشرف 2016 میں علاج کی غرض سے دبئی گئے تھے جہاں امریکن اسپتال میں چھ سال تک ایمالوئےڈوسس جیسی اعضا متاثر کرنیوالی بیماری کیلئے زیر علاج رہنے کے بعد 79 سال کی عمر میں گزشتہ اتوار کو انتقال کرگئے تھے۔
